Mawroh, Risaw 12: Iwei i longkmie iba kyrteng i Kong Philomina Parïong, 76 snem ka rta, iba shong ba sah ha Mawroh, Eastern West Khasi Hills District, u la khlad noh hadien ba kawei ka kali Cellerio ka la lymbub ïa i ha ka surok bah NH 44E ha ka por ba i dang ïaid ban leit thied sniang na Markasa.
Kane ka la jia mynta ka sngi bad kadei ruh ha ka Shnong Mawroh. Katkum ka jingïathuh u Sordar Mawroh, Bah T. Sohshang, la ong ba ym shym la don ba ïohi kumno kane ka kali ka tynrah ïa ine i Longkmie, hynrei dei tad ynda la lap kawei ka kali kaba bud nadien ba kiba don hapoh kali ki la lap ba ine i longkmie i kyllon ha madan bad im tip briew shuh, Mar kumta la wan sa ki para shnong kiba rep harud ka surok bad ki la pyntip sha kiba haïing ha Mawroh bad pynkit artad ïa i sha Markasa PHC. Hynrei namar ba i la jur ka jingshitom la pynkit noh sha Mairang Civil Hospital. Ha kane ka Hospital la ai jingsumar katba lah, hynrei nangne ruh ki la phah ban pynkit noh sha Shillong ban ïoh ka jingsumar kaba kham bha. Pynban hamar ba wan ka Ambulance ban kit ïa i, i la khlad noh.
Katkum ka jingïathuh u Sordar la ong ba ki Pulit ki la pyntip ba kane ka kali ba lymbub, kadei kaba mih na Wahrit ban leit kit dawai ïa ka Wahrit PHC. Hynrei kaei kaba pynbitar ka long ba arngut ki briew, kynthup ïa u draibar kane ka kali kidei kiba la buaid. Da ka jingpyntip ba kyrkieh ki paidbah na Mawroh bad bad kiwei de lyngba ka whatsapp groupbad kumjuh ki Pulit Mairang, la ïoh bar ïa kane ka kali ha shuwa ban poi Mairang ha ka por ba ka la wan phai na Nongstoiñ.
Ki Pulit ki la kem nih ïa kine ki arngut bad ka jingtohkit ka dang ïaid.
