Khlad hashen u rangïalehkai Table Tennis ha ka jingaksiden ha Shangbangla

Nongpoh, Ïaïong, 17: Uwei u rangïalehkai Table Tennis bapaw ha ka ri India uba dang 18 snem ka rta ïa uba la tip kyrteng kum u D. Vishwa ryngkat u nongñiah jong ka kali Maruti Swift Desire ki la duhei ïa la ka jingim ha ka jingjia aksiden ha ka sngi U Blei ha ka shnong Shangbangla, Ribhoi District.
Ïa u nongniah jong ka kali Maruti Swift Desire uba la tip kyrteng kum u Dipal Das. Katba 3 ngut kiwei pat kiba shong lang hapoh kane ka kali ki la mynsaw bad la pynkit noh sha Civil Hospital, Nongpoh bad hadien pat la pynkynriah sha NEIGRIHMS, Shillong.
Katkum ka jingïathuh jong ki Pulit, kane la jia ha ka por 1.45 baje eiei katba une u rangïalehkai uba shong da ka kali Maruti Swift Desire na Guwahati, uba dang wan na Chennai, bad mih na Guwahati Airport ban leit sha Shillong na ka bynta ban ïashim bynta ha ka 83rd Senior National Table Tennis Championship ka ban sa long ha nongbah Shillong.
Ynda la poi ha Shangbangla kawei ka trok kit dpei dewiong kaba don ïa u nombar AP 16 TH 1393 ka la tynrah ïa ka kali Swift
Desire Tourist kaba don ïa u nombar AS 25 CC 8413. Kane ka trok kaba la tynrah ïa ka kali Tourist ka la thung baji sha riat kaba jrong kumba 50 mitar na surokbah National Highway.
Ha kane ka jingjia ka Trok bad ka Maruti Swift ki la pra na ka jingïatyngkhuh bad u nongñiah jong ka trok u la mynsaw jur.
Ïa u nongñiah jong ka trok uba la mynsaw jur la pynkit noh sha Civil Hospital Shillong na ka bynta ka jingsumar.
La ïoh jingtip ba u D. Vishwa u dei ruh uba dang pule ïa ka B.Com ha Loyola College, Chennai uba dei ruh u rangïalehkai jong ka Tamizhaga Table Tennis Association (TTTA). U la long ruh u lahduh ha ka U-19 boys Singles Title ha ka National Ranking Tournament ha Dehradun ha u snem 2021 bad u la thmu ban wan sha Shillong na ka bynta ka National Table Tennis Championship.
Na ka liang jong ki Pulit ki la register case bad pynlong ruh ka jingtohkit halor kane ka jingjia.
Halor kane ka jingjia basngewsih, ka Meghalaya Table Tennis Association (MTTA) lyngba u Vice-President u Bruce P Marak bad u General Secretary u Chiranjib Choudhury ki la pynpaw ïa ka jingsngewsih kaba jur bad ong ruh ba kan long ka jingduhnong kaba khraw ïa ka ri India hi baroh kawei.
U Kpa bad ki bahaing hasem jong u Vishwa tang shu ïoh jingtip halor kane ka jingjia kin wan sha Nongpoh ban shimti ïa ka met jong u lashai ka Lah Sngi u Blei.
Ka MTTA ka la pyntip ba ka la phah arngut ki dkhot sha Nongpoh khnang ban pynthikna ba baroh ki jingdonkam yn pyndep noh mardor bad ban pdiang burom ruh ïa ki bahaing hasem jong u Vishwa ha Guwahati Airport lashai ka Lah Sngi u Blei. Ki bor synshar ka Ri-Bhoi kin sa shimti ban pynpoi ïa ka met jong u sha Chennai.