Nongpoh, Lber 23: Kawei ka longkmie na ka shnong Umta Ri-Bhoi District ka la khlad noh hashen hadien ba ka la shah tynrah ha kawei ka trok katba ka dang thmu ban jam sha shilliang surok ha Mawdiangum, Ri-bhoi District.
Katkum ka khubor bala ïoh lum na ki pulit la ong ba kane ka jingjia ka la jia ha ka janmiet jong ka 22 tarik Lber ha ka por kumba 5:50 baje eiei ha kaba kawei ka trok kaba don ïa u Registration number NL 01 AC 4395 kaba dang hiar sha ki thaiñ Guwahati, hynrei ynda poi ha ka shnong Mawdiangum Ri-Bhoi District ka la tynrah ïa kawei ka longkmie kaba dang thmu ban jam sa shilliang u surok bah NH 6 haduh ba kan da mynsaw jur.
Katei ka longkmie kaba la shah tynrah ha katei ka trok ka dei kaba la tip kyrteng kum ka kong Sotlibon Ingty 57 snem ka rta kaba dei na ka shnong Umta Ri-Bhoi District bad tang hadien ka jingïoh jingtip ki pulit ka Nongpoh Traffic Police ki la leit mar mar sha katei ka jaka ban pynlong ka jingtohkit hynrei ïa katei ka longkmie la pynkit noh sha Nongpoh Civil Hospital da ki paidbah shuwa ban poi ki pulit, hynrei namar ka jingmynsaw kaba la kham jur ki doctor ki la pynbna ba ka la khlad noh ha katei ka jaka sumar.
Na ka liang ki bahaiing hadien ka jingkyrpad la pynlait noh ban leh ïa ka Post Mortem bad la aiti noh ïa ka met sha ki bahaiing ban pyndep ïa ka jinglehniam ba khatduh, ka jingtohkit halor katei ka jingjia ka dang ïaid shakhmat.
