Shillong, Naitung 17 : Ha kawei ka jingjia kaba sngewsih, arngut shi paralok ki khun samla ki la duh ei ïa ka jingim hadien ba ki la hap ban shah rong ha ka um ha ka wah ha Umsawli.
Kat kum ka khubor pulit ba la ïoh la ïathuh mynta ka sngi ki katto katne ngut ki samla kiba dei shiparalok ki la ïapynbeit leit kai sha Umsawli. Hynrei ha ka por janmiet arngut ki la btuid bad hap shapoh wah bad shah rong ha ka um namar kim nang ban jngi.
Hadien ba la pyntip ia ka jingjia sha ki bor pulit ki pulit ki la leit sha katei ka jaka bad haba la wad ki la ïoh ban sei ïa baroh ar ki met iap uwei u dei uba sah ha Sngi Thiang, Lower Mawprem bad uwei pat na Nongmynsong.
U SP u la ïathuh ba u la ïoh jingtip halor kane ka jingjia hynrei kat haduh ba thoh ïa ka khubor um pat ïoh ïa ka jingtip kaba bniah namar ki pulit ki dang don ha ka kam ban pyndep ïa kaba donkam baroh.
