Jowai, Nailar 21: Ha kawei na ki jingjia takhuh kali ba shyrkhei kaba la jia ha ka sngi Palei ha ka por kumba 11:30 baje mynstep ha Lad Mukhla hajan ka pung Thadlaskeiñ, West Jaiñtia Hills, ha kaba kawei ka trok kaba kit Cement Clinker, kaba don ïa u number UP 76T 1960, ka la tynra ïa kawei ka longkmie hadien kata ka la kylla bad ban halor jong kawei ka Maruti Ecco Van kaba don ïa u number ML 04E 0731 bad pynjulor ïa kiwei de ki ar tylli ki kali rit.
Ha kane ka jingjia, ka trok ka la tynrah shwa ïa katei ka longkmie, ka Kong Sooki Sari kaba sah ha ka shnong Ladmukhla, kaba dang bahlang bad la i khunrit katba ka dang ïaid lynti lyngba ka surokbah.
Ïa u khunlung ba la tip kyrteng ka Hawasan Sari, 2 snem ka rta ba la mynsaw jur la pynkit noh mar mar sha Dr. Norman Tunnel Hospital, Jowai, hynrei la pynbna da ki doktor ba u la khlad noh ha shiteng lynti.
Hadien ba la pyndep ïa ka jingtohkit bad ka post-mortem ha Civil Hospital, Jowai, la aiti noh ïa ka metïap jong ka Hawasan Sari sha ki bahaïing hasem.
Kumjuh u nongñiah jong ka Maruti Eeco, uba la tip kyrteng u Bah Convince Susngi uba dei na ka shnong Nangbah, la pynkit ruh mar mar sha Civil Hospital, Jowai, hadien ba ladep ban sei ïa u hadien ba u la sahkut da ki 2-3 kynta hapoh kali Eeco kaba la shah ban bad dam syndah.
Ïa u Bah Convince ruh la pynbna ba u la khlad lypa shwa ban poi sha ka jaka sumar. Ïa ka post-mortem yn sa pyndep ha ki sngi ban sa wan.
Ïa ka Kong Sooki Sari kaba la mynsaw jur la rah sha ICU jong ka Norman Tunnel Hospital, Jowai.
Katba u nongñiah jong kane ka trok u la phet noh na katei ka jaka hadien ka jingjia aksiden.
