Khlad 4 ngut, kynthup 3 ngut ki Khynnah rit ha ka jingther u lapbah

Mairang/ Nongpoh/Shillong Jymmang 13: Saw ngut ki briew, kynthup ïa lai ngut ki Khynnah rit, ki la khlad ha ka jingher jong u slap bah mynta ka sngi, kaba la wanrah ïa ka jingshlei um bad jingtwa khyndew ba bun ki jaka.
Arngut na kine ki khynnah, kidei ki khynnah ap masi na ka Shnong Mawphyrnai kaba don marhan bad ka Shnong Mawnai ha Eastern West Khasi Hills District.
Kine ki arngut ki khynnah ki la khlad hadien ba ki la hap ha kawei ka thliew kaba ju tih shyiap, hynrei kaba la dap um na ka jingjur jong u slap. Kine ki khynnah kidei kiba dang 8 bad 12 snem. Kane ka jingjia ka la jia ha ka por 5 baje janmiet. Arngut na ki para khynnah ba ap masi lang bad ki, ki la lait na ka jingmynsaw ha katei ka jingjia. ïa ka met jong kine ki khynnah la rah sha Civil Hospital Mairang.
Uwei pat u khynnah uba la khlad udei na ka Shnong Panitola Byrnihat, haba uwei u dieng u la kheiñ na ka jingjur u slap bad ka lyer bad lynsher ïa kawei ka Auto Rickshaw kaba dang ïaid ha surok. Laingut kiwei pat ki briew ba don lang ha ka Auto ki la mynsaw.
Naka liang ki paidbah kiba la ïohi ïa katei ka jingjia kila leit ban ïarap mar mar hynrei namar ka jingmynsaw jur uwei u heprit ba dang 13 snem u la khlad noh syndon na kane ka sla pyrthei wat hadien bala pynkit sha Byrnihat PHC da ki paidbah bad 3 ngut kiwei pat kiba la mynsaw la tip kyrteng kum I Iawis Syiem 22 snem, Stillful Marwein 31 snem bad u Praksah Sangma u ba dei u nongniah katei ka auto rickshaw kamai kila mynsaw bad pynkit noh sha byrnihat PHC.
Uwei pat uba la duh noh ïa la ka jingim ha kane ka jingjia mynta ka sngi, udei u Bah Sidres Kharsahnoh na Jongksha uba la ïap na ka jingshah bhen na ka jingtwa ka khyndew.
Kane ka jingjur u slap, ka la wanrah ruh bun ka jingshlei um bad jingtwa khyndew ha kylleng kylleng ki jaka. Kawei na ki jingshlei um ba jur kadei kaba jia ha Kynshi, ha kaba ka wah Kynshi ka la shlei bad ka la pynlong ïaka shnong Kynshi kum kawei ka thwei bah. Ka surok kaba leit na Kynshi ruh ka la shlei um bad ka la wanrah ka jingsahkut kali kaba da ki bun kynta. Nangta ka la don ka jingtwa jong ki kynroh ïing briew, ki surok. Ka jingshlei um ka la ktah ruh ïa ki ïing ki sem, ki skul, ki ICDS Centre bad khamtam eh ïa ki jingthung, khamtah eh u phan uba la dei artad ka por ba ki paidbah kimn khlaw noh.
Ha Shillong ruh ka la don ka jingshlei jong ka wah Umkhrah khamtam ha Polo ha kaba ka ju don beit ka jingshlei um tang shu la jur slap. Ka la don ka jingtwa ka kynroh bad khang lynti ïa ka skul Madan Hindi Patshala School ha Madanryting.
Ka surok Shillonmh Dawki, kaba dang shu dep twa dang shi bnai mynshuwa ruh mynta ka sngi ka la twa biang ha ki bynta ba pynheh surok da ka NHIDL.