Nongstoiñ, Naitung 09: Ka jingthmu jong ka sorkar Assam ban den ïa ka wah Khri ka dei ka mat kaba la sdang naduh ki snem kiba kham mynshuwa. Hynrei haduh mynta kam shym pat la lah ban pynurlong namar ka jingpyrshah jur jong ki paitbah.
Kaba lyngngoh ka long ba man ka khep ynda ka sorkar Assam ka la pyni ïa ki dak ki shin ba kan sdang ban pyntrei ïa katei ka projek, ki paitbah ki la mih madan ban pynkhih bad ban pyrshah bad ka sorkar Assam ruh ka pynsangeh noh.
Ha kine ki bnai ba la dep ka sorkar Assam ka la phah biang da ki briew ba kin leit jurip ïa ka jaka kaba la thmu ban den ïa katei ka wah. Kumta na ka liang ki paitbah mar ïa ïoh jingtip ki la ïakynduh lang ban ïa pyrkhat halor katei ka jingthmu ban den biang ïa ka wah Khri.
U bah Stedland Nonglang uwei na ki riew rangbah ka thaiñ Rimen u ba dei ruh u Myntri jong ka hima Rambrai, haba ïakren bad u nongthoh khubor u la ong ba na ka liang ki paitbah ka thaiñ Kyrshai kata naduh ki shnong Garo Khasi bad ki shnong ba shong da ki Rabha, ki pyrshah jur ïa ka jingthmu jong ka sorkar Assam ban den ïa ka wah Khri na ka bynta ban pynmih bording Electric.
U la ong ruh ba na ka liang jong u kum u Myntri u la ai jingmut ïa u Syiem ka hima Rambrai, ba ka hima ruh ka dei ban pyrshah ïa katei ka jingthmu namar lada den ïa ka wah Khri da ki spah hectare ka khyndew jong ka hima kan kylla duriaw.
U bah Nonglang u la ong ruh ba kaba kham ktah jur eh ka dei ïa ka rep ka riang naduh ki jaka rep kba haduh ki bri kwai, bri tympew, ki shnong ki thaw bad ki jingdon jingem jong ki paitbah kum ki ïing ki sem bad kiwei kiwei.
Ha kajuh ka por u la ong ba lada ki paitbah ki ailad ba ka sorkar Assam kan den ïa katei ka wah ka lah ban siew bai lut ksan sha ki nongshong shnong. Hynrei lada ka siew ruh ki paitbah kin shem jingeh namar lada kin wad jaka shawei ruh kin ym ïoh nalor ba kiwei kim long kiba seisoh kum ha katei ka thaiñ bad ban sdang thymmai ïa ka long shnong long thaw ha kiwei pat ki jaka ka shem jingeh haduh katta katta, namar kin don shibun bah ki jingkylla naduh ka jinglong ka suiñbneng bad ki sawdong saw kun.
Kumta halor katei ka mat u bah Nonglang u la ong ba lada ki paitbah kin ieng shkem ban pyrshah bad ban ym ailad ïa ka sorkar Assam ba kan den ïa katei ka wah, na ka liang ka hima ruh kan ai ka jingkyrshan ba pura, khnang ba ka sorkar Assam kan ym ïoh lad ban pynurlong ïa katei ka jingthmu.
