Shillong, Naitung 26: Kiba bun ki seng jngohkai ka Meghalaya ha ka sngi Thohdieng ki la pynrem jur ïa ka seng Hynniewtrep National Youth Front (HNYF) namar ka rai ban pynsangeh bad ban pynphai kylla ïa baroh kiba jngohkai kiba mut ban leit sha ki bynta bapher bapher jong ka Sohra bad Dawki.
Lah ban kdew ba naduh ka step sngi Thohdieng ka 26 ki dkhot ka HNYF ki la pynsangeh ïa ki kali tourist kiba wan nabar ka jylla ha Umtyngar East Khasi Hills.
Halor kane, kiba bun ki tourism organization ba kynthup ïa ka Tourism Operators Association of Meghalaya, Federation Shillong Hotels, Meghalaya Rural Tourism Forum, Tour Guide Operator Association of Meghalaya, Meghalaya Tourist Development Forum, Tour Guide Association of Meghalaya nalor kiwei pat.
Haba kren sha ki lad pathai khubor u president ka Tourism Operators Association of Meghalaya u Bah Banlum Blah u la ong ba ka association kan sa thoh sha u myntri ka tnat tourism ban ïathuh halor ka jingjia bym poi pyrkhat bad ban dawa ka jingpynshitom kaba tyngeh pyrshah ïa kitei ki riew shimet kiba pyrshang ban buh jingma ïa ka tourism industry jong ka jylla.
U Bah Blah u la ïathuh ba hadien katei ka jingjia, kiba bun ki tourism association ka Meghalaya ki la khot pynlong da ka jingïalang kaba kyrkieh ban ïakren halor kane ka jingjia.
“Ka la long ka jinglyngngoh ym tang ïa kiba wan jngohkai hynrei ka la long kaba phyla ruh ïa ngi namar ha ka sien kaba nyngkong ngi ïohsngew ba kiba wan jngohkai ki la shah pynsangeh bad shah phah pynphai kylla sha ki jaka ba ki wan,” ong u Bah Blah.
U Bah Blah u la kam ruh ba ka la shim por da ki snem snem ïa baroh ki nongshong shnong ban ïohi ïa ka jingkiew ki kam jngohkai kum ka jingkiew ka kam ïalehkai footfall ba ka jylla ka don mynta.
U la bynrap ba ka tourism sector ka la dei kawei na kaba pynmih bha kaba bun ha Meghalaya kaba la pynmyntoi ïa ki spah ngut ki samla bad mynta ka kam jngohkai ka la saphriang wat sha ki thaiñ nongkyndong ka jylla.
“Khyndiat snem mynta ngi hap ban kyrpad ïa ki nongwan jngohkai ban wan sha jylla. Ngi la kyrpad ïa ki bad haduh ban pynngeit ba kin wan sha kane ka jylla wat la kiba bun ki jingtei kim long haduh kata ka rukom ba la khmih lynti,” u la bynrap.
` Ka jingjia ha Umtyngar ka la pynïohthiah noh namar kaei kaba la jia ha kane ka sngi kaba la saphriang ha kylleng ka ri bad kane ka ai ka dur ka dar kaba sniew ïa ka jylla Meghalaya.
“Na baroh ki tourism association ka Meghalaya, ngi kwah ban panmab ïa baroh ki nongwan jngohkai kiba la shah ktah ha kane ka sngi. Na ki seng tourism ngi kyrpad ïa baroh ki tourist ban wanphai biang naba kum kine kin wanjia shuh,” u la bynrap.
