Khih ka Education Department ban pynstet shimti noh ïa ki skul bad College Deficit ha ka jylla

Shillong, Jylliew 05 : U Myntri ba peit ïa ka tnad pule puthi u Rakkam A Sangma ha ka sngi Palei u la ong ba ka sorkar ka dang don ha ka jingpynkhreh ban pynlong ïa ka jingïasyllok na ka bynta ban shimti hi noh (provincialisation) ïa baroh ki skul bad college deficit kiba don ha kylleng ka jylla.
“Ka sorkar ka la wanrah mynta da ka Meghalaya Education Grant (MEG). Ïa mynta ngi dang don ha ka jingpynkhreh ban pynlong shwa da ka jingïasyllok bad ki bor pynïaid jong baroh ki jaka pule ba hap ha ka thup Deficit naba ka sorkar jylla ka thmu ban shimti ne ban pynlong salonsar noh ïa baroh na ki,” u la ong haba kren bad ki lad pathai khubor.
Da kaba pynpaw ba ka jingthmu ka long ban pynbeit ryntih ïa ka tnad pule puthi, u myntri u la ong, “Ngi kwah ban don la kumno kumno tang lai jait ki kynhun nonghikai, kata ki nonghikai sorkar (Government), ki bym dei sorkar (Non – Government) bad ki nonghikai skul shimet (Private).”
Katkum ka jingong jong u, mynta ka jylla ka don haduh 13 jait ki kynhun nonghikai skul bad 4-5 jait ki kynhun jong ki nonghikai college.
Da kaba kam ba ki jingeh kin don, u Myntri u la ong, “Bun ki jaka pule kin ym mynjur bad bun ki jaka pule kin kmen ban kylla long noh ki jaka pule sorkar. Kumta ngi don ïa kane ka jingïasyllok ban tip la kine ki jaka pule ba hap ha ka thup Deficit kin ai ne kin ym ai ïa ka jingmynjur.”
La ïathuh ruh ba u Myntri un kynduh lang ïa ki MLA ha kane ka sngi Thohdieng ban ïa syllok haba ïadei bad katei ka jingtyrwa na ka sorkar.
“Ka jingtyrwa ba nyngkong ka long ba ka sorkar ka dang pynkhreh ban shimti ne pynlong salonsar ïa baroh ki jaka pule kiba hap ha ka thup Defict naduh ka college haduh ki skul primary namar ki la don lypa ki kam ba la dep mang,” la ong u Myntri da kaba bynrap “Ka don ka jingeh namar ki bor pynïaid jong kita ki jaka pule ki lah ban ym mynjur hynrei na bynta kito ki bym mynjur, ka rukom ai pisa jong ka sorkar kan long kaba kham pher.
Haba kylli, u Myntri u la ong ba ka sorkar ka lah ban donkam pynlut tam sa 30-40 klur tyngka na ka bynta ban pynlong salonsar ïa ki jaka pule Deficit.
Katkum ka jingong jong u, kane kan ïarap haduh katta katta ban pynhiar ïa ka rukom siew bai klas kaba ju shim baroh shi katta da k iskul Deficit.
U la ai nuksa da kaba ong, “Ha ka Shillong College, ki don 71 tylli ki kam hikai ba la siew da ka sorkar. Ka bai klas ba la shim mynta da ka college ka long 60,000 hynrei lada kane ka college ka kylla long noh ka college sorkar, ka rukom siew bai klas kan ym poi eh tang kumba 15,000 tyngka.
Shuh shuh, u myntri u la pyntip ba ka sorkar ka pynlut haduh 2000 klur tyngka ha ka tulop jong ki nonghikai man la u snem.
“Na kane, ngi pynlut T.927 klur na ka bynta ban siew tulop sha palat 17289 ngut ki nonghikai skul deficit bad adhoc, T.366 klur na ka bynta 14,666 ngut ki nonghikai SSA bad T.216 klur na ka bynta 1399 ngut ki nonghikai college bad kiwei kiwei,” u la ong.