Sa shisien pat ka Sur ïatylli ne ïatreilang ki Seng Riewlum ka la sdang ban sawa biang, haba ha kine ki sngi baladep, u President ka UDP, u Bah Metbah Lyngdoh bad kumjuh ruh u President ka HSPDP, u Bah KP Pangniang, ki la pynpaw ba ki kwah ban don ka jingïatreilang ne ka jingïatylli ki Seng Riewlum da kaba pynpaw ruh ba ki kloi ban ïatreilang bad ka Seng VPP ruh.
Kane ka jingkhot ïatylli ki Seng Riewlum kam dei shuh ka sien kaba nyngkong ne kaba dang thymmai, hynrei kadei kaba lah slem bad kaba la ju mih ruh borabor. Ñiuma ka la don ka jingïatreilang naduh kip or mynshuwa ruh hapdeng ki Seng Riewlum lyngba ka Meghalaya Federation ha ka por jong u (L) Bah BB Lyngdoh bad u (L) Bah HS Lyngdoh. Hynrei kam shym la neh bad tang shu la dei ka por elekshon lah ïapra la ka jong ka jong. Nangta dang ha kine ki snem baladep kata ha ka elekshon MLA jong u snem 2018 la thaw ïa ka Regional Democratic Alliance (RDA),ba la ïatreilang da ka UDP bad ka HSPDP ha ka por jong u (L) Dr. Donkupar Roy bad u Bah Ardent Basaïawmoit. Pynban ha kane ka elekshon, ki la don ki jaka kiba kine ki artylli ki Party ki la ïakhun pyrshah kawei ïa kawei pat. Hadien ka elekshon ruh ka RDA ka la ïai bteng tangba ka la la long ka jingïatrei kaba tang na sla. Ha ka MDC elekshon wat lada ka RDA ka la donj hynrei kam shym la long kaba khuid bad kaba beit ha kaba ka la don ka jingïakhun pyrshah ha ka elekshon. Ha ka elekshin MLA 2023 ka RDA ka la pra noh namar ba kine ki artylli ki Party ki la ïaid noh la ka jong ka jong. Hynrei ha ka elekshon Lok Sabha, ka RDA ka la mih biang ban pynïeng kyrtong lang da u Bah Robertjune Kharjahrin, pynban u paidbah u la kyntait ïa kane ka jingïatreilang, haba u Kyrtong jong ka, u la shah rem kput bad wan ba khatduh eh napdeng ki kyrtong ba la pynieng da ki Party da kaba ïoh tang 40 hajar vote tam. Ka RDA ka la liem lut ha baroh ki 36 tylli ki Assembly Constituency jong ka Shillong Parliamentary Seat ha ka elekshon ba la jop da uwei pat u kyrtong jong ka Seng Riewlum, ka VPP, haba u Dr. Ricky AJ Syngkon u la shah jied kum u MP jong ka Shillong da kaba tam haduh 3.71 lak vote ïa u kyrtong ka Seng Congress, u Bah Vincent Pala. Wat ka jingïatreilang ka NPP bad ka BJP kiba don ha ka bor synshar ha ka jylla ruh ki la shah rem bad wan balai.
Ha kaba ïadei bad kane ka jingkhot ïatreilang ki Seng Riewlum, wat lada kiba bun ki ong ba ki don kajuh ka jingangnud bad ka jingthmu, pynban na ka jingkren jong u KP Pangniang, President ka HSPDP ha ka por ba ïalap elekshon Lok Sabha ka paw ba kam don satia ka juh ka jingthmu. U Bah Pangniang, u pynpaw ba ka RDA kam kwah ne kam ïahap satia ban wanrah ka jingkylla ha ka jylla, katba ka VPP pat kat shaba leit ka kren halor ka jingdonkam ban wanrah ïa ka jingkylla ha ka synshar ka khadar.
Shuh shuh lada peit bha ruh ïa ka rukom treikam, wat lada ka VPP ka don ïa ki nongïalam, kynthup ïa u President, u Bah Ardent Basaïawmoit, kiba la ju don ha ki Seng Riewlum ha kine ki snem baladep. Hynrei ka jingïapher ha ka jingtreikam bad ki Polisi treikam ka ïapher bha, lehse namar ka jingwan kiwei pat ki riewshemphang na ka jylli ka pule puthi, ka VPP ka la wanrah da ki polisi treikam kiba kham pher bad kiba ki paidbah ki sngewdei ban kyrshan. Ka nuksa kum ka Reservation Policy, ha kaba ki Seng Riewlum kum ka UDP bad HSPDP ki la don ha ki mang treikam elekshon jong ki, hynrei kim shym la pyntreikam ne kren eiei pat ynda ladep ka elekshon. Katba ka VPP pat kaba la buh ïa kamat ban review ïa ka State Reservation Policy ka la pynkhih paidbah ban dawa review noh bad ha ka jingïakhih lyngba ka jingshah thngan u Bah Ardent, ki paidbah ka ri ki la kyrshan bad ka sorkar jylla ka hap thung da ka Expert Committee ban study ïa kane ka Policy.
Shuh shuh ka jingïapher hapdeng ka VPP bad ka UDP bad HSPDP ka long ba ka VPP ka tyrwa sha ki paidbah ha ka jingsynshar kaba khuid ba suba da kaba kren pyrshah ïa ka bor pisa ha ka por elekshon, katba kiwei pat ki Seng Riewlum kim kren satia ïa kane ka mat kaba u paidbah u angnud.
Kumba ka paw hi na ka elekshon MP, imat u paidbah um kwah shuh ïa kata ka jingïatreilang ki Seng Riewlum, hynrei u la kwah ban don noh tang kawei ka Paryy Riewlum bad ba u paidbah un kyrshan radbah ïa ka ban ïakhun pyrshah ïa ki National Party. Tangba ka result kaba shai kan long ha ka elekshon MDC bad kumjuh ruh ha ka elekshon MLA ka ban long ha u snem 2028.
