Shillong, Nohprah 01 : U President ka Meghalaya Pradesh Congress Committee (MPCC) u Ma Vincent H Pala, ula pdiang biang ïa kiba bun ki nongïalam kiba la mih na ka party bad ong ba ka jingwan phai jong ki, ka dei ka dak ban khie im biang ka Congress ha ri-lum Garo.
“Kiba bun ki briew kiba ju don bad ka Congress bad kiba la mih, mynta kila sngewthuh ba dei tang ka Congress kaba ïakhun na ka bynta ki ritpaid bad ki riewlum, bad dei na kata ka daw ba kila wanphai biang” ong u Ma Pala.
U Ma Pala ula shim ba ka jingïaphet seng hashuwa ki elekshon kala kylla bad pynpaw ïa ka jingsngewskhem ba ka Congress kan lah ban lehbha ha ka elekshon GHADC ban wan.
“Ngi la ïoh 67 ngut kiba pan ticket na ka party” ula ong haba bynrap ba ka Congress kala pynkhreh bha na ka bynta ka elekshon GHADC hynrei ka dang ap ïa ka Sorkar ba kan pynbna ïa ki tarik jong ka elekshon.
“Ngi la pyndep ïa ki kam ba donkam ban leh. Ngin sa pynbna ïa ki kyrteng ki kyrtong tang mar syn pynbna ïa ka tarik jong ka elekshon” ong u Bah Pala haba bynrap ba mynta ka dang kloi palat ban batai lypa ba haduh katno seat ka Congress kan jop.
U Ma Pala ula ban jur ba u soh jong ka elekshon hi ka shong ha kiba bun kiei kiei, kynthup ka Liang Pyrshah bad kiwei ki party. Ula pynpaw ruh ïa ka jingsngewskhem ba ka Congress kan leh bha ha ka elekshon, haba kdew ïa ka jingdon ïa ki kyrtong kiba biang.
Haba kylli, une u Heh ka Congress ula pynpaw ba haduh mynta hi kam pat don satia kano kano ka jingïakren bad kino kino ki Myntri Sorkar, kiba la shah weng dang shen naka kynhun Myntri ba ïalam u Conrad K Sangma hynrei ula ban jur ba ka jingkhlaiñ bad jinglah lehbha ka party ha ri-lum Garo kan dei kaba kongsan bha ha kaban khring pat ïa kiba la phet seng.
“Ngim pat don ka jingïakren, hynrei ngi pdiang ïano ïano ruh kiba kwah wanphai” ong u Bah Pala.
