Shillong, Jylliew, 08: Ha ka sien kaba ar ka Iingbishar Meghalaya High Court ka la kyntait sharud bad kheiñ ïap ïa ki ar tylli ki jingpynbna (Notifications) ba la pynmih da ka Sorkar Jylla na ka bynta ban pynkha kawei ka post Officer on Special Duty (Technical) ha ka tnat Printing and Stationery bad ban pynkynriah ïa u Director barim jong ka Printing and Stationery sha kane ka post.
Ïa ka rai la pynmih ha ka sngi Baar da ka Bench jong u Justice Hamarsan Sing Thangkhiew halor ka jingujor ne ka writ petition ba la mudui da u Director barim ka Printing and Stationery u Salgira R. Marak uba la ïakhun pyrshah ïa kine ki ar tylli ki jingpynbna ba la pynmih da ka tnat Printing and Stationery ha ka 9 tarik, Naiwieng, 2022 kaba ïadei bad ka jingpynkha ïa ka post OSD (Technical) bad ka jingpynkynriah ïa u sha kane ka post.
Ka Ingbishar Meghalaya High Court ka la kdew ba ka jingleh jong ka Sorkar Jylla da kaba shna ïa ki Rul kaba pynbeit ïa ka jingthungkam bad ïa ki kyndon jong ka kam na ka jingbym don jong ka Aiñ lyngba ka jingpynbna ka “dei ka jingkyntur sha ka rai jong ka ingbishar.”
Ka ingbishar ka la kdew ruh ba ka Sorkar Jylla kaba la shah mudui ka la pyni ïa ki jingpynbna ba la pynmih bad ba la pynbha khnang ban weng ïa ki jingdkoh ha ka jingpynbna ba la pynmih mynshwa ïa kaba la kdew da ka ingbishar ha ka jingbishar kaba 17 tarik, Nailar, 2020, bad ka jingpynbna kaba thymmai kam dei kaba ktah shimet ïa u nongmudui. “Hynrei, ka jingshisha hi ka long ba ka jingpynbna ka kdew ba ki la pynbna hadien ba ladep pynbeit janai bad ha kaba ïadei bad ka jingpynbna kaba la pynmih ha ka 8 tarik, Nailar, 2019, ïa kaba la kheiñ ïap da kane ka ingbishar, ka la ai jaka ïa ka Sorkar Jylla kaba la shah mudui ban pynksan halor kine ki jingpynbna ba ladep pynmih,” ong ka Ingbishar.
“Watla katta, na ki daw kiba la kdew hangne, ka jingpynbna ba la pynbna No. SG.12/97/238 bad No. SG.12/97/239, baroh ar tylli ha ka 9 tarik, Naiwieng, 2020 la kyntait sharud bad la kheiñ ïap bad ïa ka jingmudui (writ petition) la ailad ban ïaid shakhmat,” la ong ka rai jong ka ingbishar.
U Senior Lawyer u U.K Nair uba la ïasaid na ka bynta u Marak ha ka jingkyrpad hakhmat ka Ingbishar u la ong ba ka jingpynbna (notification) ba la pynkha ïa ka post OSD (Technical) ha ka kyrdan Senior Grade jong ka Printing and Stationery (Technical Grade), ka long ka bym lah shuh ban dang bteng namarba ka post Senior Grade ka dei ka kyrdan bad katkum ka Rule 4(2) jong ka Printing and Stationery (Technical) Service Rules, manla kawei pa kawei ka post ka dei ka kyrdan ba laitluid bad ka jingleit na kawei ka kyrdan sha kawei pat ka dei ban long katkkum ki Rul.
Shuh shuh u Nair u la kdew ba ka Rule 7 jong ka Printing and Stationery (Technical) Service Rules kaba kdew ïa ka rukom thungkam bad ha kaba ïa ki post ha ki kyrdan bapher bapher yn hap ban pyndap kam shah lane kam ailad ban thung OSD (Technical) ha ka kyrdan Senior Grade.
Une u Senior Lawyer u la kdew ruh katkum ki rai bapher bapher jong ka ingbishar Supreme Court ban kyrshan ïa ka ka jingïasaid jong u ba ïa ka rai jong ka ingbishar yn ym lah ban shah pynduh ha ka jingpynbna jong ka Sorkar.
Shuh shuh u Nair u la ong ba ka jingleh jong ka Sorkar Jylla ka long ban weng beit ïa u Marak na ka post Director, Printing and Stationery kaba long pynban kum ka jingpynkheiñ ïa ki Rul bad ka long kumba shong halor ka jingkyrpad nalor ba ka Ingbishar High Court ka ladep ai ïa ka rai kham mynshwa kaba ong, “bym lah ban ai jingbit.”
Lah ban kdew hangne ba kane ka dei ka sien kaba ba ka jingpynbna ba la pynmih da ka Sorkar halor kajuh ka kam yn kheiñ ïap da ka Iingbishar High Court.
Ha ka jingbishar bad ka hukum ba la pynmih ha ka 17 tarik, Nailur, 2020, ka High Court ka la kheiñ ïap bad kyntait sharud ïa ka Notifications No. SG.12/97/169 bad SG.12/97/170 ba la pynkih ha ka 8 tarik, Nailar, 2019, halor ka nongrim ba kim ïaid katkum ka aiñ bad nalor kata la shu pynmih da kaba pynkheiñ ïa ki kyndon.
Ka Notification No. SG.12/97/169 kaba 8 tarik, Nailar, 2019, la mang ban pynkha ïa kawei ka post OSD na ka bynta u Marak ha ka tnat Printing and Stationery Department. Shuh shuh lyngba kane ka Notification No. SG.12/97/170 jong kane ka tarik, ïa u Marak la thung kum u OSD ha kane ka tnat.
