Khatduh ïawai hap tur hi u MLA ban pan leit jingïarap na u Myntri ka Sorkar Pdeng

Nongpoh, Naitung 14: Kumba la sakhi da ki paidbah, ka jingleit shah thngan ka Kong Bindas Syiem ha Nongbah Shillong dang shen ban dawa ban pynbha ïa ka surok na Nongpoh-Umden-Sonapur, la iohi kum ba kan sa urlong noh, ha kaba la don ka jingkhihwin kaba jur, hynrei ha kaba khatduh pat kum u MLA ka Nongpoh Constituency, u Bah Mayral Born Syiem, u la hap hi ban wad ïa ki lad ki lynti na ka bor sorkar na ka bynta ban pynbha noh ïa katei ka surok, kaba la angnud da ki paidbah ban ioh ïa kata ka surok rong kaba paka kaba ki la shitom la bun snem mynta na ka jingsniew ka surok.
Kine ki jingshisha ki la paw ba u MLA ka Nongpoh, u Bah Mayral Born Syiem, u la hap ban thaw hi ïa ki lad ki lynti, ka dei dang shen kata ha ka 12 tarik u Naitung, 2024, ha ryngkat u Myntri rangbah ka jylla, u Conrad K. Sangma u la leit ban kynduh ïa u Jyotiraditya Scindia, Myntri ka tnad Development of North Eastern Region (DoNER) jong ka sorkar pdeng ha nongbah Shillong bad ha katei ka sngi, u la aiti ruh da ka dorkhas sha utei u myntri ban kyrpad ban mang tyngka na ka bynta ban pynbha noh ïa ka surok na Nongpoh kaba ïaid lyngba ka Umden shaduh sha Sonapur.
Kumba la pynpaw ruh, ha katei ka jingïakynduh ïa u Myntri ka sorkar pdeng, ha katei ka dorkhas u la kyrpad jur ïa u myntri ka sorkar pdeng ba un shim khia lem, namar kum ki paidbah nongleit nongwan lyngba kate ka surok, ki la mad jingeh shisha na ka daw ka jingniew ka surok bad ruh la bun phew snem mynta ki la hap ban shah ïa ka jingjynjar na ka daw ka jingsniew palat katei ka surok.
Kumba la paw ha katei ka dorkhas, u MLA ka Nongpoh, u Bah Myaral Boen Syiem, ula kyrpad na u utei u myntri ka sorkar pdeng ban mang pisahaduh 52.98 klur lyngba ka NESIDS (Roads) jong ka Ministry of DoNER, naka bynta ban siang rong pynbha ïa ka surok Nongpoh-Umden-Sonapur kumba 20 km hadien ba ïa ka jingtyrwa (Proposal) la dep ruh ban phah sha u Secretary ka North Eastern Council lyngba ka tnad Planning, Investment Promotion & Sustainable Development jong ka sorkar Meghalaya katkum ka shithi No PLR.2/2017/192 haka 25 tarik Jylliew 2024.