Shillong, Nohprah 11 : Ka Khasi Hills Autonomous District Council ha ka sngi Balang ka la pynbna ba baroh ki nongdie madan ha u pud u sam jong ka Council kam pher la ki dei ki Khasi lane ki bym dei Khasi ba ki hap ban rejistar noh ha ka Council.
Ïa kane la pynbna da u Chief Executive Member (CEM) ka KHADC, Bah Pynïaid Singh Syiem haba kren bad ki lad pathai khubor hadien ka jingïalang jong ka Executive Committee kaba long ha kane ka janmiet.
“Baroh ki nongdie madan kynthup ïa kiba dei ki Khasi haduh ki bym dei Khasi ki hap ban rejistar noh ha ka Council. Na bynta ki bym dei Khasi ki hap ban ïoh shwa ïa ka Trading Licence ha shwa ba kin bteng ïa ka kam khaii pateng jong ki ha u pud u sam jong ka Council,” ong u CEM haba kren bad ki lad pathai khubor.
U Bah Pynïaid u la ong ruh ba ki nongdie madan mynta kim lah shuh ban shu shong die jingdie pathar ha ki lynti iew, ki rud surok bad ruh ki jaka paidbah khamtam kito ki bym don ïa ka Trading Licence. Shuh shuh u ong ba kane ka Rules ka long kaba donkam bha na ka bynta ban pynkhlaiñ shuh shuh haba ïadei bad ka Market Act kaba la ïoh ïa ka jingmynjur na u Lat dang shen.
“Ïa kane ka Rules yn sa wanrah ha ka Dorbar Tlang kaban sa long ha ka 19tarik mynta u bnai,” u la ïathuh shuh shuh.
Shwa kane, u CEM u la pyntip ruh ba ha u pud u sam jong ka KHADC ki don bun bha ki nongdie madan la ka long ha ki iew jong ki Hima bad ha ki iew jong ka KHADC kum ha Laitlyngkot, Byrnihat, Nongstoin bad kumjuh ha ki jaka iew jong ki shnong bad ki riew shimet.
“Ngi la ïoh khubor bad ruh ka jingujor na kiba bun ba la bun palat ki nongshong madan la ka long ha ki thaiñ Laitumkhrah, Dhanketi, Khyndailad, Mawprem, Khlieh – Iew bad kiwei kiwei kiba ym lah shuh ban ithuh tip ki biang neem ki kot ki sla bad ki jaka sah bad ym tip ruh naei ki wan,” bynrap biang u CEM.
Nalorkata, u ong ruh ba kumka Council ka sngewkhia halor ka jingïoh rung ki briew kiba nabar kiba wan kamai khlem da bud ïa ki kyndon jong ka sorkar kumjuh jong ka KHADC.
“Ki don bun bha ki jaidbynriew kiba shong die madan kiba ymtip shaei ki sah bad kane ka don ka jingma ïa ka sor shillong namar lada ki leh kano kano ka kam sniew ha ri jongngi kan eh ban wad namar ym don rekod ïa ki,” bynrap biang u CEM.
Ha kajuh ka por u CEM u la ïathuh ruh ba ki la dep ban pynsngew ha ka sorkar jylla da kaba kynduh ïa u Myntri ka tnad Pynroi Sor kumjuh ïa u Bah Paul Lyngdoh halor ka jingai jaka die madan ha ki jaka ba la pynkhreh da ka sorkar khnang ba ki briew lajong kiba ym pat donkam donkam kin ym shah knieh noh ka hok ha ki briew kiba nabar.
Na ka liang u CEM u la ong ruh ba kane ka sienjam ban phah rejistar wat ïa ki Khasi ba die madan kadei namar ki ju ïohi ba ha ki dukan ba dei jong kiwei hynrei ha ka por ba khynra pat dei ki Khasi ba wan kam trai.
