Shillong, Ïaiong 25 : Hadien khyndiat bnai ba ki don bad ka party thymmai, katto katne ngut ki MLA jong ka Congress ki la pynpaw ba ki kwah ban wanphai biang sha ka party kaba ki jop ha u 2018 tangba na ka ka liang ka party kam patiaw shuh ïa ki.
“Ngam ailad ïa kine kiba leit ba wan ha la ka mon la kadei ïa ki MLA ba dei na ka AITC lane nangno nangno ruh. Ngim kwah ba ka Congress kan dei ka party kaba ïa leit ïa wan, ngi dei ban pynmlien ban don ka discipline,” ong u President jong ka Meghalaya Pradesh Congress Committee, Bah Vincent H Pala.
Katkum ka jingong jong u, um sngewtynnad da lei lei ruh ba ki nongmihkhmat paidbah kin kyntiap na kawei ka seng sha kawei pat. “Ki la don kiba pynpaw tangba kam don satia ka jingïakren namar ngam kwah satia ban ailad,” la bynrap biang u Bah Pala.
Shuh shuh u la ong ruh ba u i kamkai haduh katta katta ïa ka jingïarung ïa mih bad dei na kata ka daw um kwah ba ha Congress ruh kin ïa kyrsum lang kumjuh. U ong ruh ba lada kum ki nongmihkhmat kim shaniah dalade ïalade bad ïa ka party kaba pynjop bad khamtam ïa ki nongtrei party kiba pynjop kumno ki paidbah kin shaniah pat ïa ki ha ki elekshon ban wan.
“Kumta nga pyrshang ban kiar na kum kine kiba shet kylla ïa ka party bad phet nangto shato la kadei ha ka kam synshar khadar ne ha ka kam ïing kam sem,” u la ong.
U Bah Pala uba dei ruh u President ka MP ka Shillong u ong ruh ba ka jingjied ïa ki kyrtong ha baroh ki 60 tylli ki constituency na bynta ka elekshon ban wan ha u 2023 kan dei beit da ki briew ki bym satia kano kano ka jingthoh bria.
