Nongstoiñ, Jylliew 21: Wat haba ki ong ba ka pisa ne ka spah kam lah ban thied ïa ka jingstad, pynban kam shym la long kumta ïa u kup shilliang sem shilliang namar haba kim kot bor, la khanglad noh ïa ki ban jam shakhmat namar ka jingbym don pisa.
Kane ka la jia ïa uwei u khynnah u ba la pas bha ha ka eksam matrik dang shen, u ba don ka jingthmu ban pule kham shakhmat. Hynrei namar ba u wan na ka longïing kaba duna ha ka ïoh ka kot, kumta wat haba u la ïoh ïa ka kyrdan kaba nyngkong ryngkat ki marks kiba heh bha ha man la ki sobjek, u la hap ban duh ban pule bad ban tur kham shakhmat ban poi shaduh ka thong kaba u angnud.
Utei u samla u dei u ba la tip kyrteng kum u Jacobson Lyngkhoi 16 snem ka karta, khun jong u bah Darius Basaïawmoit bad ka kong Sabina Lyngkhoi kiba dei ruh na ka shnong Kynrud, kawei na ki shnong kaba don ha ka thaiñ jong ka Eastern West Khasi Hills District.
Utei u khynnah u dei u ba pule ha St.Joseph Minor Seminary Pyndengrei Nongstoiñ bad u dei u khun khatduh jong kitei ki shi jur bad ki kmie ki kpa jong u ki dei kiba la noh ha ka karta bad kiba shu im da kaba bylla sngi ryngkat ka trei ïa la ka lyngkha kaba malu mala.
Kumta u hymen jong u dei u rishot ba kongsan eh na ka bynta ka jingim jong utei u Jacob, hynrei namar utei u hymmen u dei pat u ba la don la ka ïing ka sem wat hapdeng ka jingdurut ban trei shitom na ka bynta u para lade, mynta ka kynti u la ïakynduh mawsiang bad u la hap ban pyrta briew ban khmih ïa ka jingïarap.
Watla hapdeng katei ka jingeh, hynrei utei u samla u la ong ba u don ka jingkyrmen ba U Blei un plie ïa ka lad na ka bynta jong u, namar dei U Blei hi u ba la ai ïa kane ka jingstad.
Ki marks kiba utei u khynnah u la ïoh ki kynthup ïa ka sobjek English 71, Khasi 91, Mathematic 83, Science & Technology 94, Social Science 85, Health 98 ha ka percentage kaba 87.
Hato, Imat ym don jaka ïa kiba duna ha ka ïoh ka kot ba kin poi sha ka thong, ne hato ka jingduk ka lah mo ban khanglad ïa ki samla kiba la pas bha bad kiba thrang ban tur shakhmat ha ka jingpule bad kiba la leh hok?
