Khliehriat, Rymphang, 14: U District Magistrate jong ka East Jaiñtia Hills District u la pynmih ïa ka hukum kaba khang pyrshah ban pynlong ïa kino kino ki jingïakop ïatur masi kyrtong hapoh ka District baroh kawei.
Katkum ka hukum hapoh ka Section 163 BNSS la maham tyngeh ba kino kino kiba pynkheiñ ïa kane ka kyndon kin ngat ha ka jingshah pynshitom katkum ka aiñ.
Katkum kane ka hukum ba la pynmih ha ka sngi Thohdieng la pyntip ba ka ophis u District Magistrate ka la ïoh pdiang ïa ki jingpyntip ba ka jingpynlong ïa ki jingïakop pynïatur masi kyrtong ka jur bha hapoh ka district khamtam ha ka por ba pynlong ïa ki Fete bad kiwei pat ki tamasa ha ki katto katne ki bynta jong ka East Jaiñtia Hills District.
Kane ka hukum ka ong ruh, lada shah ban pynlong ïa ki jingïakop pynïatur masi kan pynkheiñ ïa ka kyndon 11 jong ka Prevention of Cruelty to Animals Act, 1960 bad ïa ka hukum jong ka Ïingbishar Supreme Court kaba la khang pyrshah ïa kiba kum kine ki jingpyrshang ha ka hukum ba la pynmih ha u snem 2014.
Kane ka hukum kan treikam noh mardor tad haduh ban da pynbna da kumwei pat.
