Shillong, Risaw, 25: Ka NEHUSU bad ka KSU NEHU Unit ha ka sngi Thohdieng ki la khang tala ïa ka ophis treikam jong u Registrar ka skulbah NEHU, u (retd) Colonel Omkar Singh bad phah mih da ka bor ïa u na ka kamra treikam.
Kine ki ar tylli ki kynhun jong ki seng samla pule ki la dawa ïa u Vice Chancellor u Prof. Prabha Shankar Shukla ban weng kam shi syndon ïa u Singh da kaba kynnoh ba um pat long uba bit bad uba kot kyrdan ban bat ïa ka shuki Registrar jong ka skulbah NEHU.
Shwa kane, ki dkhot jong ka NEHUSU bad ka NEHUTA ki la mih jyndat na ka jingïalang jong ka jingïalang 113 Academic Council (AC) hadien ba u Vice Chancellor u la kyntait ban pdiang ïa ka jingdawa ba u (Singh) dei ban mih mardor bad um dei satia ban shong ha ka jingïalang.
Haba kren sha ki lad pathai khubor hadien ba la khang tala ïa ka ophis u Registrar, u President jong ka NEHUSU u samla Sandy Sohtun u la ong ba ki sngewdiaw namarba ba u Vice Chancellor u la leh kuman bad um shym la ai ka jingïatreilang haba ki la kyrpad ba un bthah ïa u Registrar ban mih noh na ka jingïalang jong ka Academic Council.
U President ka NEHUSU u la ong ba kim kwah ban don ïa u Registrar u bym pat kot kyrdan ban shong ha ka jingïalang kum u Secretary jong ka Academic Council bad ban buh jingthoh ïa ki jingïakren ha ka jingïalang.
Katkum ka jingong jong u, wat ki nongïalam jong ka NEHUTA ki la dawa ïa u Vice Chancellor ban ym shah ïa u Singh ban shong ha ka jingïalang.
“Khatduh ngi la rai ban mih jyndat na ka jingïalang namar ka jingleh kuman jong u Vice Chancellor u bym ong eiei wat shi kyntien ruh ïa u Registrar ban mih noh na ka jingïalang. Ngim kwah ïa ki briew ki bym don jingnang jingtip ban shong ha ka jingïalang jong ka kynhun kaba halor jong ka skulbah,” la ong u President ka NEHUSU.
U la ong ba kum ka kynhun ki samla pule kin sa phah da ka jingthoh sha u Myntri ka Sorkar Pdeng uba khmih ïa ka Ministry of Education, sha u Myntri Rangbah ka Jylla u Conrad K. Sangma bad sha ki bor ba dei peit ha Delhi ban dawa ba dei ban wengkam noh mardor ïa u Registrar.
Na ka liang jong u President ka NEHUTA u Prof. Lakhon Kma u la ong ba ka NEHUTA ka ai jingkyrshan ïa ka jingdawa jong ka NEHUSU halor kane ka mat.
U la ïathuh ba ki la ong ïa u Vice Chancellor ba kim don jingtip mano ba ki dkhot jong ka Selection Committee kiba kitkhlieh ban jied ïa u Singh kum u Registrar.
U la ong, u VC u la pyrshang borbah ban pynksan ïa ka jingthungkam ïa u briew u bym kot kyrdan ha ka shuki Registrar.
U la kynnoh ba u VC bad ki briew kiba ïajan tam kynthup ïa u Registrar ki la pynjngut ïa ka dur bad ïa ka kyrteng bapawkhmat jong ka skulbah.
