Nongstoiñ, Jylliew 23: Ka KSU Ri Muliang Circle hapoh ka jingïalam jong u Samla Dominic Kharmaw ha ryngkat ki dkhot, ha ka 22 tarik Jylliew ka la leit ban khang tala noh ïa U Tower Jio u ba don ha Umwahlang, namar ka jingbym biang network mynta la ar taïew.
Haba kren bad ki lad pathai khubor, na ka liang ki Nongïalam ka seng ki la pynrem jur ïa ka jingbym lah pyntreikam bha jong ka Company Jio ïa utei u tower bad ha ka juh ka por la pynlong ïa ka seng ban khang syndon ïa utei u tower, namar ka jingbym lah treikam bha jong ka Company Jio.
Shuh shuh ki Nongïalam jong ka seng ki la ïathuh ruh ba ki la dep ban pynsngew ïa ki Nongtrei jong ka Company Jio ban pynbit pynbiang bha ïa utei u tower. Hynrei ki leh bym patiaw ïa ka sur jong ki paitbah ka thaiñ bad dei halor kane ka Nongrim ki Nongïalam ka seng ki la shim syndon ïa ka rai ban khang tala ïa utei U Tower.
Ha kajuh ka por ka seng ka kyntu bad ban jur ïa ka Company Jio ba ki dei ban pynbiang noh mardor ïa ki jingduna ha baroh, kiba ïadei bad ka jio network, namar ka ktah shibun ïa ki Nongshong shnong, khamtam ha kum kine ki juk technology bad jia lada kim lah ban pynbiang ha kine ki sngi, ki Nongïalam kin hap shim syndon da ki sienjam ba tyngeh, pynkut ka kyrwoh na u Samla Dominic Kharmaw.
