Shillong, Nailur, 22: Ka Khasi Students Union (KSU)-NEHU Unit ha ka sngi Palei ka la pakhang lynti ïa u Vice Chancellor ka skulbah North Eastern Hill University (NEHU) u Prof. P.S Shukla ban rung sha ka ophis treikam jong u hadien ba ka la mih ka jingïania kaba jur hapdeng kine ki ar mamla hadien ba ki bor pynïaid jong ka skulbah NEHU kim shym la lah ban pynurlong ïa ki jingdawa jong ki samla pule kane ka skulbah.
Ki dkhot ka KSU ki la khang tala ruh wa ïa ka ophis treikam jong u Vice Chancellor bad ai por ruh tang shi taiew ba un pynurlong ïa ki jingdawa jong ki samla pule.
Ka Seng ka la buh hakhmat u Vice Chancellor ïa ki mat jingdawa kiba bun kiba kynthup ïa ka jingduna ki nonghikai ha ki Department bapher bapher, ka jingbym biang ki Bos kiba ju leit shaw bad leit on ïa ki samla pule, ka jingbym biang ki lad ai jingsumar, ka jingbym biang ki jingdonkam jong ki samla kiba sah ha ki hostel bad kiwei kiwei.
U General Secretary ka KSU NEHU Unit u samla Shibaitlang Rymbai ha ka jingïakren bad ki lad pathai khubor u la ong ba ka NEHU mynta ka donkam kyrkieh ban thung ïa ki nonghikai namarba ki samla pule ki la ïakynduh jingeh na ka daw ka jingthylli ki post nonghikai.
“Ki samla pule na ki Department bapher bapher kim pat ïoh lad ban shong klas ha ki katto katne ki sobjek na ka daw ka jingbym don nonghikai watla ka Semester ka la sdang mynta la ar bnai eiei,” ong u samla Rymbai.
U Samla Rymbai u la ïathuh ba watla ka NEHU ka la sdang ban khot rungkam ïa ki nonghikai ba shipor hynrei ka rukom thungkam ka long kaba suki haduh katta katta bad kane kan pynduhnong ïa ki samla pule.
Namar ka jingbym biang ki Bos kiba leit shaw bad leit on ïa ki samla pule kiba shahniah beit tang ha ki Bos jong ka skulbah, u nongïalam ka KSU u la kynnoh na ka daw ka jingbym biang ki Bos ka la pynlong ïa ki samla pule ban shu ïa phngian ha ki bos ba la pynïaid da ka NEHU kat haduh ba ka la pynsuhsat shikatdei eh ïa ki samla pule.
U la bynrap ruh ba ka jingai jingsumar ka la hiar arsut namarba kane ka skulbah ka don hapdeng ka jingkyrduh ki dawai dashin bad ki samla pule ki hap ban shu thied ïa ki dawai nabar ka Campus haba ki pang ki shitom bad kane ka la ktah bha ïa ki samla pule kiba wan na ki longiing kiba kham duna ka ïoh ka kot.
Ha kaba ïadei bad ki Hostel, u Samla Rymbai u la kynoh ba ki hostel kim biang satia bad ki long kiba isaitmet bad la donkam kyrkieh ban phah maramot thymmai khnang ban pynsah ïa ki samla pule kiba wan na ki jaka ba jngai ka jylla bad nabar ka jylla.
“Watla ka jingmaramot ka dang ïaid shakhmat, hynrei ka la ktah bha ïa ki samla pule kiba donkam ban khreh kot bad sah hapoh ka Hostel,” u la ong
Halor kane, u Samla Rymbai u la ong ba ka KSU kan ai por tang shi taiew ïa u Vice Chancellor ban pynurlong ïa ki jingdawa jong ki samla pule.
