Shillong, Rymphang, 13: Ki dkhot jong ka KSU Malki Circle ha ka sngi Baar ki la khang tala ïa ka ophis treikam jong ka Kompeni Swiggy kaba don ha Nongmalki Road hadien ka jingshah behkam haduh 6 ngut ki khynnah Khasi kiba la trei slem hapoh kane ka kompeni khlem kano kano ka daw kaba biang.
Ka jingdawa jong ka Seng ka long ba ka kompeni ka dei ban pynrung biang ïa kine ki hynriew ngut ki khynnah Khasi khlem da pynslem bad khlem da ai kino kino ki daw hynrei lym kumta ka seng ka la maham ba kan ym shah shuh ïa ka kompeni ban plie ïa ka ophis treikam hapoh u pud u sam jong ka shnong Malki
Ka seng ka la kyntu ïa ki bor badei peit bad ïa ki bor shnong ruh kumjuh ba ki dei ban pynkhlaiñ ïa ki kyndon pynïohkam pynïoh jam ïa ki samla Khasi shwa ba kin ai jingbit lane ai NoC ïa kino kino ki kompeni kiba plie ïa ki shlem khaii hapoh ka shnong Malki.
Shuh shuh ka seng ka la kyntu ïa ka Dorbar Shnong ba ka dei ban buh da ki kyndon ba ki kompeni ki dei ban pynthikna ba ki nongtrei kim dei ban shu trei da ka jingsyier mynsiem na ka jingshah behkam kyndit kaba ju jia na ka por sha ka por.
