Khang tala ka KSU bad NEHUSU ïa ka Ophis treikam u VC ka NEHU ba thmu pynlong EC sha Delhi

Shillong, Naiwieng 4 : Kum ka dak ka jingpyrshah jur ïa ka jingthmu jong u Vice Chancellor (VC) ka NEHU u Prof P.S Shukla ban khot ïa ka jingïalang ba 193 jong ka Executive Committee (EC) ha nongbah Delhi Ka KSU NEHU Unit lem bad ka North Eastern Hills University Student Union (NEHUSU) ki la leit ban khang tala syndon ïa ka ophis treikam jong u VC ha NEHU mynta ka sngi.
Ha ka shithi ba la phah sha u Pro VC ka NEHU U Prof Sumarbin Umdor, ki ar seng ki la pynpaw ka jingpyrshah jur ïa ka jingthmu ban pynlong ïa ka EC ha Delhi kaba long kum ka jingpynkheiñ ïa ki kyndon jongka tnad pule puthi jongka sorkar pdeng namar kat kum ki kyndon ïa ka EC dei ban pynlong ha Phyllaw jongka University hi.
Kine ki seng ki la pynbna da ka Non Cooperation Movement pyrshah ïa u VC ka NEHU u Prof Shukla namar um ju wan ophis shuh bad u la shu ïehbeiñ ïa ki samla pule hapoh ka NEHU.
Ka jingpep jongu ban wan sha ka University la 354 sngi ka la ktah jur ïa ka jingtreikam jongka NEHU khamtam ïa ki rai ba dei ban shim na ka bynta ka kam pule dangle hapoh ka University.
Kine ki arseng ki la pynpaw ruh ba kumba long mynta ka NEHU ka don hapdeng ka jingkyrduh pisa bad ki la buh ka jingkylli nangno la ïoh pat ïa ka pisa ban pynlong ïa ka EC ha Delhi.Ki pynpaw ba kane ka dei ka jingthmu ban leh katba mon bad khamtam ba ki samla pule kin ym ïoh ban leit ïa shim bynta.
Kine ki arseng ki la rai ba kino kino ki rai ki ban shim ha katei ka jingïalang ha Delhi yn ym ithuh ne pdiang da lei lei ruh da ki samla pule bad dawa ba dei ban pynlong beit ïa ka EC ha NEHU hi khnang ban don ka jingkhuid jingsuba bad ka jingshai kdar ka ïakren ïa khana hapoh ka jingïalang da kiba ïashim bynta lang baroh.