Shillong, Naitung 18: Ka Hynñiewtrep national Youth Front (HNYF) Women Wing(WW)ha ka sngi Nyngkong jong ka 18 tarik ka la leit ban khang tala ïa kawei ka dukan ha Ïewduh kaba la shong wai da u bar jylla bad kaba u la pynïaid be-aiï khlem don satia wat tang ka trading licence bad um ju siew bai wai satia naduh u snem 2019.
Ïa kane ka jingleit khang tala la ïalam da ka Kong Bety Jyrwa ha ryngkat ka jingsynran lang ka trai jong kane ka dukan ka Kong Rani Jyrwa.
Haba kren bad ki lad pathai khubor ka Kong Bety Jyrwa ka la ïathuh ba kane ka jingleit khang jong ka ïa kane ka sdukan kaba u Susanta Choudry u la shim wai na i kong Rani Marbaniang ka long hadien ba ka Ïing Bishar Khasi Hills Autnomous District Council ka la pynksan ba ka kong Rani ka dei ban ioh bai wai bad ba lada une u bar jylla uba shim wai um lah ban ka don hok ban leh kum ka trai. Shuh shuh ka Kong Bety ka la ïathuh ruh ba hadien ba ki la ioh jingpynksan na ka Ïing Bishar na ka liang ki trai ki la leit ban ai da ka jingujor sha Lumdiengjri PS bad dei hadien ba ka thanat kam leh eiei ba ka HNYF Women Wing ka shim da kane ka sienjam.
Shuh shuh ka kong Bety ka la buh jingkylli ruh ïa ka KHADC bad ïa ka ophis u Syiem ka Hima Mylliem namar ka jingai lad jong ki ban plie ïa kane ka dukan khlem da ioh licence la lai snem kynthih bad wat hadien ba na ka liang ka Kong Rani ka la dep ai jingtip sha ka ophis la bun bun sien.
Ka Kong Bety Jyrwa ka la ïathuh ba hadien ba ka la dep thied ïa kane ka dukan na ka liang jong ka ka la leit ban ïakren bad une uba shim wai na ka laing pat jonhg u um kohnguh hynrei u pynibor pynban. Shuh shuh ka la ïathuh ba une u bar jylla ha ka por ba ka leit pan bai wai u kren heh pynban bad u la leit ujor ruh sha Ïing Bishar. “Dei hadien ba ka Ïing Bishar ka la pynksan bad ba ka ophis u Syiem Mylliem ka la ithuh ïa nga kum ka trai ba nga leit ban pan jingïarap na ka HNYF” ïathuh ka ong Rani.
