Shillong, Naitung 18 : U Superintendent of Police (SP) East Khasi Hills u Bah Vivek Syiem ha ka sngi Thohdieng, u la pynmih ïa ka hukum ba khang ïa ki kali heh (Heavy Motor Vehicles) naduh ki trok ki night supper bus ba kin ïaid na ka surok shnong Demseiniong (Macabe road).Une u Heh Pulit ula pyntip ba ïa kane ka hukum la pynmih kat kum ka jingpynjari kyndon 163 BNSS da ka Deputy Commissioner ka East Khasi Hills.
U Bah Vivek u pyntip ba la ïoh jingtip ba ki kali heh kynthup ki bos Night Super ki ju wan ïaid na Diengpasoh bad wan rung sha Shillong lyngba ka shnong Demseiniong, kaba la wanrah ïa ka jingjot ki surok bad ki sainar elektrik.Ula pyntip ba kine ki kali heh kila buh jingma ruh ïa ki ïingbriew kiba don markhap ka surok ha ka thaiñ nalor ka jingpyn thut ïa ka jingïaid ki kali.
Namar kata, u pyntip ba kat kum ka jingpynjari ka Deputy Commissioner bad ban khanglad ïa ka jingnang jot ki surok bad ka jingshngaiñ ki nongkynti ki briew ha ka thain, la khang ïa ki kali heh kynthup ki bos night super ba kin ïaid lyngba ka shnong Demseiniong (Macabe Road). Nalor kane, ula pyntip ruh ba baroh ki kali heh kynthup ki bos night super yn shah noh ban ïaid lyngba ka surok Diengpasoh tang haduh Itshyrwat kata ruh tang hapdeng ka por 9 baje mynmiet haduh 6 baje mynstep jong ka sngi kaba bud. Ula pyntip ba yn ym shah ïa ki kali heh ban ïaid sha Demseiniong.Une u Heh Pulit ula ong ba kino kino kiba pynkheiñ ïa kane ka hukum kin ngat haki jingpynsajia kat kum ka aiñ.
