Shillong, Naitung 28: Ka bor pynïaid distrik jong ka East Khasi Hills ka la pynmih ïa ka hukum ban khang pyrshah ïa ka jingtheh ktieh, ki jaboh jabaiñ bad ki mawria ha kylleng ki surok jong ka nongbah Shillong bad ha ka distrik baroh kawei.
Kane ka hukum ba la pynmih da ka District Magistrate ka Kong Rosetta Mary Kurbah ka dei kaba la thmu ban ïada na ki jingjia takhuh kali bad ban pynthikna ïa ki lad jingïada ruh ha ki surok, khamtam ha kine ki por ba dang dei ka aïom slap.
Kane ka hukum kan khang ïa ka jingtheh ktieh bad ki mawria ha ki surok, ha kane ka wanrah ka jingma kaba ktah ïa kiba ïaid kjat bad kumjuh ruh ïa ki kali kiba ïaid ha ki surok.
La bthah ïa baroh ki trok ba kin tap ïa ki tiar ba ki kit da ki tarpaulin khnang ban ïada na ka jingpynhab ïa ki jaboh jabaiñ bad ba ki dei ban pynkhuid ïa ka ktieh na ki shaka ha ka jaka ba ki pynhab ïa ki jingkit jong ki.
Kane ka hukum ka maham ruh ïa kino kino kiba pynkheiñ ïa kane ka hukum ha kaba kin ngat ha ki jingshah pynshitom hapoh ka Section 223 jong ka BNS bad kiwei pat kiba ïadei bad kane ka kyndon.
Kane ka hukum kan treikam noh mardor bad kan neh bad treikam tat haduh ban da pynbna da kumwei pat.
