Nongstoin, Nailur 12: U District Magistrate West Khasi Hills District, Bah Garod L.S.N. Dykes, IAS u la pynmih hukum da ki kyndon aiñ hadien ba la ïoh jingtip ba don ki briew kiba ju dih duma ha ki jaka paidbah hapoh ka District.
Katkum ka Section 4 jong ka Cigarettes and Other Tobacco Products Act (COTPA) 2003, ka jingdih duma ha ki jaka paidbah ka long kaba la khang lut. Kane kynthup ïa ki skul, hospital, balang, ki ICDS Centres, ki ophis sorkar, ki lynti paidbah, bus, sumo bad taxi stand, ïew bad kiwei ki jaka paidbah. Shuh shuh, katkum ka Section 6 jong ka COTPA, la khang pyrshah ban die duma sha ki khynnah kiba dang hapoh 18 snem.
Da kaba pyndonkam ïa ka bor kaba la ai hapoh ka Section 163 jong ka BNS Act 2023, u District Magistrate, u la pynbna ban khang pyrshah ïa ka jingdih duma ha baroh ki jaka paidbah bad ruh ban khang ïa ka jingdie duma sha ki khynnah rit. Kito kiba pynkheiñ ïa kane ka hukum yn pynsajia katkum ka Section 223 jong ka BNS Act, 2023 bad kiwei ki kyndon jong ka COTPA, 2003.
Namar ka jingdonkam kyrkieh, la pyntreikam mardor ïa kane ka hukum bad kan neh beit kumne tad ynda la pynbna da kawei pat.
