Khliehriat, Nailar, 08: Hadien ka jinglap ïa ka jingtngit bad jingbym biang ka rukom shet ïa ki jingbam bad ka rukom thew, ka tnad Food Safety ka jylla ka la phah khang khyrdep ïa ki lai tylli ki dukan ha East Jaiñtia Hills District.
Kitei ki dukan ba shah khang ki long kawei ka Exotic Restaurant kaba don ha Khliehriat bad artylli ki dukan shna Ice Cream bym don kyrteng kiba don ha Dkhiah, East Jaiñtia Hills District ba la pynïaid da ki bar Jylla.
Ka tnad Food Safety hapoh ka jingïalam ka Kong DBS. Mukhim Deputy Commissioner bad ka Assistant Commissioner Food Safety Jaiñtia Hills ka Kong E. Pyngrope, Food Safety officer West Jaiñtia Hills District Bah P.W Lyngdoh ryngkat ka jingsynran ki pulit, haka 7 tarik Nailar ki la hiar jurip ïa ki dukan die jingbam ha West Jaiñtia bad East Jaiñtia Hills District.
Haka jingjurip ïa ki dukan ha East Jaiñtia Hills District, kine ki heh ka tnad ki la lap ïa ka jingtngit bad jingjaboh jong kitei ki dukan, wat ki nongtrei ruh ki long kiba ja-ing.
Kane ka jinglong jingman bad jingbym lehkhuid ka buh jingma ïa ki paidbah nongbam nongdih, la ong ka Kong Mukhim.
Ka tnad Food Safety ka la bthah ïa kine ki dukan ba kin khang khyrdep haduh ba kin da pynbiang lut ïa baroh katkum ka jingbthah kynthup ïa ki kot ki sla bad ka jingkhuid jingsuba.
Katba ha West Jaiñtia Hills District, la jingjurip ïa baroh ki dukan die doh masi bad dohsniang ba don ha Ïawmusiang.
Hadien ka jingjurip ka Kong DBS. Mukhim ka la ong, ka dang long kaba eh namar kadei ruh ka sien kaba nyngkong ïa ka ban ïohi ïa ka jinglong jingman jong ka ïew die doh hapoh Jowai, hynrei ïa mynta ka la ong ba donkam ka jingïatreilang shwa jong ki nongdie doh bad ki nongpynïaid iew ryngkat ka tnad.
Ka la pyntip ba kan sa khot ka jingïakynduh lang jong baroh ki nongdie doh bad nongpynïaid ïew ha Jowai ban ïakren imir jingmut ban leh ïa kaei kaba bha tam bad ban wanrah ka jingkylla kaba lah ban neh ha kaba ïadei bad ka doh.
