Shillong, Nailur 07: U Drugs Controller General of India (DGCI) u la kyntu ïa ki nongpang bad ki Doktor ba kin sangeh noh ka dawai dap lyer ka Digene Gel.
Ka daw ba ka bor ba dei peit ia ki dawai dashin kadei namar ba ka la mih ka jingartatien ha une u bnai baladep, ha kaba ki nongdih ki la lap ba kane ka dawai ka la kylla rong lieh bad ka la kthang bad mih ruh ka jingsma kaba sngewpher.
Kane ka dawai la ong ba ka lonbg acid bad la ju dih ki briew kiba dap lyer ka kpoh bad kiwei de ki jingpang kpoh.
Halor kane ka jingbthah na u DGCI, ka tnad ka koit ka khiah ka jylla, ka la pynmih ka hukum ban khang noh kyrkieh ka jingdie ïa kane ka dawai ryngkat bad ka jiongkyntu ïa ki paidbah ba kim dei ban pyndonkam ïa kane ka dawai.
Ka kyrwoh ba la phah da i Assistant Drug Controller of Meghalaya, ka la maham ïa ki nongdie dawai la ki long ki long kiba die lang ne kiba die khutia ba kim sangeh noh ka jingdie ïa kane ka dawai bad bthah ruh ïa ki Inspector ba kin leit khynra ïa ki dukan die dawai baroh.
“Ngi la shim kyrkieh ïa kane ka jingbthah jong ka DGCI bad ki paidbah kim dei ban tieng ne leh kulmar bad kin ïatreilang bad ki bor sorkar”, la ong I Assistant Drug Controller ka jylla, da kaba bynrap ba kiba bun ki dukan dawai kiba la sangeh noh ka jingdie ia kane ka dawai.
