Jowai, Risaw 04: Ka Sub Division Officer (Civil) Amlarem Civil Sub-Division Amlarem kala pynmih ïa ka hukum ha ka 3 tarik ban khang shwa shipor ïaki trok kiba kit mar bad ïa ki trok kit maw ban ïaid na ka surok Lad-Umsyiem shaduh jingkieng Dawki, hadien ka jingïoh ujor kumjuh na u Addl. Deputy Commissioner, Pynursla Civil Sub Division.
La khang ïa kane shibynta ban lait na kino kino ki jingjia ba sngewsih, la kyntu ruh ïa ki paidbah ban long kiba ïaishah shipor tad haduh bala dep ban maramot ïa ki bynta ka surok ba twa dang shen, khnang ban shngaiñ ka ïaid ka ïeng ki kali.
Baroh ki kali kit mar ki dei ban ïatreilang bad kane ka jingpynbeit da kaba sangeh shwa ban ïaid na katei ka surok.
