Khang ka India ban wan shalan ïa ki mar Bangladesh khamtam ki jaiñ bad ki marbam

New Delhi, Jymmang 17 : Ka India, ha ka sngi Saitjaiñ, ka la pynmih ïa ka hukum ban khanglad noh ïa ka jingshalan ïa ki katto katne ki jait mar kynthup kum ki jaiñ ba la shna lypa bad ki mar bam ba la dep saiñ, ban wanrah na Bangladesh.
Na ka liang ka Directorate General of Foreign Trade (DGFT), lyngba ka Commerce Ministry, ka la dep ruh ban pynmih ïa ka jingpynbna (notification) halor kane ka bynta.
Ha kane ka notification ka khang tyngeh ban shalan ïa ki katto katne ki jait mar kum ki jain ba la dep suh lypa bad ruh ki marbam ba la dep sain nalor kiwei kiwei na Bangladesh ban pynpoi sha India, ong ka Ministry.
Hynrei la ong pat kum kitei ki jingmaham kin ym treikam ïa ki tiar na Bangladesh kiba ïaid lyngba ka India ban leit sha Nepal bad Bhutan.
Kane ka hukum ka ong ruh ba ki jain ba la dep suh lypa kiba wan na Bangladesh yn ym shah satia ba kin ïaid na kino ki ki kad. Hynrei la shah tang lyngba ka Nhava Sheva bad Kolkata Seaport.
Na bynta ki soh : ki umsoh bad kiwei ki jait jingdih, nangta ki soh ba la dep sain (ki jingbam ba la dep shet, ki biskit, ki chip bad kiwei ki jingbam), u kynphad bad kiwei ki mar kynphad, ki plastik bad kiwei ki tiar ba shna na ka plastik, ki tiar ba shna na ka dieng, ka notification ka ong ba kitei ki tiar ba wan na ka ri ba marjan yn ym shah ban pynpoi lyngba kino kino ki Land Customs Stations bad ICPs (Integrated Check Posts) ha Assam, Meghalaya, Tripura bad Mizoram; bad ruh ka LCS Changrabandha bad Fulbari, ha West Bengal.
La bynrap ruh ba kine ki jingmaham kin ym treikam pat ïa ka jingshalan ia ki dohkha, LPG, Edible oil bad ki mawtyllait na Bangladesh.
Ban wanrah ïa kine ki jingkylla, la kynthup sa ïa ka paragraph ba thymmai ha ka Import Policy jong ka Ri kaba tehlakam ïa ka jingshalan ïa kine ki mar na Bangladesh sha India kaban treikam noh mardor, ka la ong.