Khang ka Ïingkashari ïa u Nongkhaii na Assam ban khaii dewïong na Gasuapara

Shillong, Jymmang 26: Ka Ïingkashari Meghalaya High Court ha ka sngi balang, kala hukum ïa uwei u nongkhaii dewïong na Assam ba un pynsangeh shuwa ïa ka jingkhaii dewïong na Gasuapara Land Custom Station, South Garo Hils District sha Bangladesh.
Ka Ïingkashari kala pynmih ïa kane ka hukum halor ka mukotduma bala mudui da uweiu Nongshongshnong ka Gasuapara uba dei ruh u Nongkhaii dewïong u Maikel T Sangma.
U Maikel ula mudui mukotduma pyrshah ïa ka Sorkar Jylla, ïa u Director General of Police, Secretary ka Tnad Mining & Geology, Deputy Commissioner bad Superintendent of Police ka South Garo Hills, Director ka Tnad Menerals Resourcesm Commissioner ka Tnad Custom (NER) bad ïa une u Nongkhaii uba kyrteng u Balwant Soni uba dei u trai jong ka Jai Maa Coal Pvt Ltd.
Katkum ki lad pathai khubor na Assam, la ïathuh ba u Balwant Soni u dei u nongkhaii dewïong uba la shah kem tang ha ki Pulit ka Assam ha ki khyndiat bnai bala lah halor ka ejahar bala mudui da ka Tnad lum Khajna ba u shukor ha ki kam siew khajna ba kot kumba T. 40 klur.
La kynnoh ba u Balwant Soni u dei u Khlieh (Kingpin) jong ki mafia khaii dewïong na Jylla Meghalaya bad u dei uba pynïaid iew ïa u dewïong ba mih napoh ka Jylla lyngba ka Gasuapara Land Custom Station.
Ka Jai Maa Coal Pvt Ltd ka dei kaba la pynïaid da u Balwant Soni katba u Khun u Youdhistra Soni ula bat ïa ka kam Director bad ka Kurim kum u Charttered Accountant.
Kane ka khubor ka kynnoh ba Longïing jong u Balwant Soni ka dei kaba don jingïadei ba iajan bha bad u Myntri ka Sorkar Jylla James K Sangma uba dei u para jong u Myntri Rangbah ka Jylla Meghalaya u Conrad Kongkal Sangma.
Kat kum ka mukotduma, u Maikel ula kynnoh ba ka don ka jingpyrshang khaii tuh ïa u dewïong khlem da ïoh jing bit lane khlem da thew da won na Gasuapara. U pyntip ruh ba ula phah da ka jingujor sha ka Chief Secretary ka Jylla ha ka 20 tarik Jymmang hynrei haduh mynta kam pat ai jubab satia.
U Maikel ula kynnoh ruh ba u Deputy Commissioner ka South Garo Hills ha ka 29 tarik Ïaiong, 2022 ula pynmih ïa ka hukum ba ailad ïa u Balwant Soni ban khaii ïa u dewïong bym lah ban tip katno u don.
Ka Ïingkashari kala buh ban shong bishar biang ïa kane ka mukotduma ha ka 30 tarik Jymmang 2022 haba hukum ba u Balwant u dei ban sangeh shuwa ïa ka jingkhaii dewïong na kane ka kad khaii.