Shillong, Jymmang 06: Ka Ïingkashari Meghalaya High Court hynne ka sngi thohdieng, kala hukum ba ym dei shuh ban shah ïa ka jingtih mawshun ha Jylla khlem da ïoh ïa ka jingbit kat kum ka Mines & Minerals (Development and Regulation) Act, 1957.
Haba shong bishar ïa ka Public Interest Litigation (PIL), ka Ïingkashari ba arngut ki nongbishar ba kynthup ïa u Chief Justice Sanjib Banerjee bad Justice W Diengdoh kala ong “Ïa mynta hi, la ka Sorkar kala pynbeit ne em ïa ki jingduna, ka Jylla ka dei ban pynthikna ha kaban khang ïa ka jingtih mawshun khlem da ïoh ïa ki jingbit kat kum ka MMDR Act, 1957”.
Kane kala mih hadien ba ka Sorkar Jylla kala file ïa ka action taken report (sienjam ba kala shim) halor ka kam tih mawshun. U Advocate General ula kdew ba ka Jylla kala dep ban pynkylla ïa ki katto katne ki kyndon jong ka Meghalaya Minor Minerals Concession Rules, 2016 ban pynbeit ïa ki jingduna ne jingbym biang kiba don ha kane ka Rules.
Hynrei u Nongmudui, Bah Lawyerson War ula ieng skhem ha ka nongrim ba ka jingtih be-aiñ ïa u mawshun ka dang ïai bteng khlem sangeh watla ka Sorkar Jylla kam don bor ban ai jingbit ïa ka jingtih mawshun naba u mawshun u dei u major minerals lait tang ha ki khep bym lah lait haba pyndonkam ïa u mawshun ban pynkylla shun kum ka mar tei jingtei bala kheiñ ïa une u mawpoh khyndew kum u minor mineral.
Kat kum ka jingong une u Nongmudui, halor ki jingbit ba ai da ka sorkar Jylla, katto katne ngut ki briew ba don ïa ka bor, kila tih ïa u mawshun khlem sangeh bad die ruh ïa u mawshun sha ki briew ha Bangladesh lane wat sha ki karkhana dewbilat kiba don ha Jylla bad sha ki Jylla ba marjan.
Halor kane, ka Ïingkashari kala ong “Naba ym shym la lah ban pynbiang tarajur ïa ka jingkynnoh ba la tih maw shun bad die paidbah da ka jingai jing bit ka sorkar Jylla haba nujor bad ka jingmudui ba nyngkong, la ailad ïa u nongmudui ban ai ïa ka affidavit bynrap ba un pynpaw ïa kaei ka jingshem jong u ïa ka jinglong jingman ba mynta.
Ka Ïingkashari kala buh ban shong bishar biang ïa kane ka kam ha ka 31 tarik u Jymmang.
