Shillong, Jylliew, 22: Ka Hynñiewtrep National Youth Front (HNYF) ha ka step sngi Palei ka la leit phah khang ïa ki shlem treikam jong ki Bank kiba don naduh ka thaiñ Motphran, ter ter shaduh Police Bazar kiba la plie watla ka Sorkar ka la pynbna shuti kum ka jingkynmaw burom ïa ka jingwan iuhkjat jong u Rev. Thomas Jones, ïa uba la tip kum u Kpa ki Khasi Alphabet, ha ka shnong Saitsohpen Sohra ha u snem 1841.
Ha ka jingïakren bad ki lad pathai khubor u President jong ka HNYF East Khasi Hills u Bah Bless Dkhar u la ong, “lada ngi ka sngi burom kyrpang ïa ka lyngkhuh sngi kha jong u Mahatma Gandhi, kum ka jaitbynriew Hynñiewtrep ka donkam ba kan burom ïa kane ka sngi kyrpang jong u Rev. Thomas Jones.”
“Kan myntoi aiu ka jingdawa ban pynrung ïa ka Ktien Khasi ha ka Khyrnit Baphra jong ka Riti Synshar ka ri India lada ngim burom ïa kane ka sngi kyrpang jong u Rev. Thomas Jones,” u la ong.
