Khang dam lut ki dukan ha ki bynta ka G.S.Road naduh Motphran sha Khyndailad

Shillong, Rymphang 21: Ki dukan kiba don ha ka thain GS road naduh Motphran ter ter shaduh sha Khyndai kila khang lut, khlem da don wat tang kawei ruh ka ban plie khamtam eh ha ki kynta ba la sdang ka jingleh burom khatduh ïa u MP u (L) Dr Ricky AJ Syngkon ha shwa ban rah sha u lum jingtep.
Kane ka jingkhang jong ki dukan kadei na ka jingkyrpad ka seng Hynniewtrep Youth Council ïa baroh ki lad kamai kajih, ki bank, ki jaka pule, kiba trei kam hapoh u pud u sam jong ka ri lum Jaintia bad kumjuh ruh ha ri lum Khasi ba kin khang ha ka 21 tarik u Rymphang, ban burom ïa ka sngi ontep ïa u MP u (L) Dr Ricky AJ Syngkong.
Na ka liang jong ka HYC lyngba lyngkdop jingthoh, ka la niew ba u dei u khun ba kyrpang jong ka bri u Hynniewtrep bad u nongïalam uba aiti lut na ka bynta ki jaka puta jong ka bri u hynniewtrep.
Ym tang ka jingkhang ki dukan, hynrei la don ruh ki seng bhalang kiba la leit ban phah noh ïa ki bank kiba plie ha kane ka sngi bad kumjuh ruh ïa kiwei ki jaka trei kam kiba don hapoh ka nongbah Shillong, jong ka East Khasi Hills District.
Katkum ka jingsakhi u Mawphor la lap ba ki dukan na Motphran sharum ter ter haduh ban da poi sha Khyndai lad jan baroh ki dukan ki khan glut lait noh tang katto katne tylli bad kiba bun kidei tang ki nongdie madan ha rud surok.
Kumba la sakhi ym tang ba khang dukan hynrei wat ki taksi ba kamai ruh ki wah lama ïong bad ki kali kiba ïaid ha ki surok ruh ka duna bha, haba ïa nujor bad kiwei ki sngi nalor ba kadei ka sngi Saitjain.
Wat haba rung shapoh ïewduh kiba bun ki dukan jong ki bar jylla ki khang, hynrei ki don ruh kiba plie ba kynthup lang jong ki Khasi ruh kumjuh bad don ruh kiba plie tang shiteng ka jingkhang.