Nongpoh, Jylliew 13: Ka jingjyllei kiba pyndonkam plastic ha kine ki sngi ka la buh shisha ka jingma ïa ka mei mariang, namar bun na ki paidbah nongshong shnong ha ka District bad wat ha ka jylla ruh haduh mynta kim pat sati kata ka jingkitkhlieh ha kaba ïa dei bad ka jingpyndokam plastic bad bun na ki paidbah ha ka jaka ba kin pyndonkam ha kata ka rukom kaba paka ban nym ktah ïa ka mariang bad ki la shu bret pathar ïa ki jaboh kiba la ktah ïa ka mei mariang bad khamtam ka jingma ïa ka khyndew.
Halor kane ka jingpyndonkam bakla ïa ki plastic, lah ruh ban pynpaw pyrthei, namar ha man ki jaka paidbah la iohi ba ki dap ki plastic ba la shu bret pathar da ki paidbah bad teng kum ha Ri Bhoi ki ju don ruh ka jingshlei um ha ka surokbah National Highway-6 ha Ri Bhoi bad ka daw ka long ba jan baroh ki jaid plastic la shu bret ha ki nala um bad ha ka por lyiur ba jur slap ki plastic ki set ïa ki nala bad ka wan rah pat ka jingshlei um.
Dei halor kane ka nongrim, ka jingpyndonkam bakla ïa ki plastic naduh ki paidbah bad haduh ki karkhana ba shna plastic bad ki nongdie plastic, u Deputy Commissioner ka Ri Bhoi u la hap ban pynmih ïa ka hukum ba hap ban pyndokam ïa ki plastic katkum ka jingbthah ba la buh da ka sorkar.
Kum ka jingbud ryntih ïa ka kyndon bala pynmih da ka Ministry of Environment, Forest and Climate Change jong ka sorkar India bad ka jingpynbna paidbah bala pynmih da ka tnad Meghalaya State Pollution Control Board halor ka jingkhang ban shna, buh thup, shalan, die bad pyndonkam ïa ki plastic kiba palat ka jingrben na ka hukum bala buh, u Deputy Commissioner ka Ri-Bhoi District u la pynmih syndon da ka hukum ban khang lut ïa ka jingpyndonkam ïa ki plastic ki ba hapoh 120 micron ka jingrben.
