Khambun na kiba pang bampong dei kiba pyndonkam bha ïa u duma, ong ki doktor NEIGHRIMS

Shillong, Jymmang 31: Kum ka dak ka jingrakhe ia ka “World No Tobacco Day”, ka tnat jong ka Surgical Oncology and College of Nursing, NEIGRIHMS, da ka jingkyrshan ka Northeast India Association of Surgical Oncology (NASO), ki la pynlong ïa ka jingai jingsumar ne ka health camp bad ka prokram pynsngewthuh halor ka jingpang bampong ha Diengpasoh Health and Wellness Centre.
Dr. Caleb Harris, Head, Department of Surgical Oncology, ba la synrang lang da ki doctor bad ki samla pule nurse na NEIGRIHMS ki ai ka jingïasyllok kaba khlem donkam siew halor kine ki jingpang kiba ju ïoh manla ka por ha kane ka camp. Ka kynhun ka ai ruh ka jingïasyllok halor ka jingdonkam ban phah khmih bniah ïa ka jingpang bampong kaba long kaba kongsan na ka bynta ki briew kiba don kane ka jingpang kaba la khamjur ha ka shyntur, ka shadem bad ki cervical cancer.
Ka la don ruh ka jingïalehkai drama ne skit kaba lyngkot ba la pynlong ban ai ka jinghikai pynsngewthuh shaphang kumno ban ïada na ka jingpang bampong, da kaba pynleit jingmut ruh kyrpang halor ki jingktah na u duma bad ki jingmyntoi kiba lah ban ïoh lada pynduh noh ka jingpyndonkam ïa u duma.
U Prof. (Dr.) Nalin Mehta, Director, NEIGRIHMS, u la ïaroh ïa kane ka jingpyrshang jong ka kynhun na NEIGRIHMS naba bun na kiba pang bampong ha ka jylla Meghalaya ka dei kaba don ka jingïadei bad ka jingpyndonkam ïa u duma.
U la bynrap shuh shuh da kaba pynpaw naba kane ka dei ka kam kaba sngewkhia shibun da kaba pyrkhat ruh ïa ka jingpyndonkam ïa u duma ha ka kynhun, khamtam ki samla lud, na ka liang ka NEIGRIHMS ka la buh ka jingangnud ban pynbha ïa ka koit ka khiah ha ka kynhun bad kumjuh ruh ban pynlong ki jingpynsngewthuh shaphang ka jingpang bampong ha baroh ki shnong kiba marjan.