Kham pawki bar jylla ïa ka ktien Khasi ban ïa ki trai muluk

Nongstoiñ, Jylliew 14: Ki ar ngut ki shi para kiba dei ruh ki khun synrap kiba kynthup ïa ka Sniha Kumari bad ka Shruti Kumari khun jong u Chotelal Thakur bad ka Prabha Devi, kiba pule ha St. Xavier Secondary School New Nongstoiñ West Khasi Hills District, ki la pynkyndit ïa ki nonghikai, namar ba napdeng jong kitei ki synrap ka Sniha, ka dei kaba la ïoh distinction ïa ka subject Khasi da kaba khur bad kot haduh 80 marks na ka 100.
Hynrei ka Shruti pat ka la duna tang 6 marks ban kynjoh sha ka distinction bad ka la pynpaw ruh ka jingsngewdiaw, namar ha ka jingshisha ka la thmu ban kynjoh sha ka thong, namar ka ong ba ka sngew bang, sngew tynnad bad ieit ïa ka Ktien Khasi.
Kine ki khynnah ki dei kiba dang shu pass shen ïa ka eksamin matrik mynta u snem 2021- 2022, kiba la ïoh 1st division bad ki dei ruh kiba la shong la sah tang da ki 10 snem tam ei ei ha Nongstoiñ. Lah ban ong ba kane kam dei ka sien kaba nyngkong ba ki bar jylla kin ïoh distinction ïa ka Khasi ha kane ka thaiñ, namar ha ki snem ba la lah ruh ki la don ki bar jylla kiba la sah ha Nongstoiñ, hynrei kham paw pat ha ka sobjek Khasi.
Lah ruh ban kynthoh ba ka long shisha ka ban pynsngew lehraiñ ïa ki para Ri kiba hapoh ka bri u Hynñiewtrep ki bym da kheiñ kor bad leh bym nang ban thoh ban tar ha ka ktien lajong. Hooid don shisha ki katto katne kiba ju ong “ngam nang Khasi” wat haba kim shym la dei wat tang ki khun shiteng jaid ruh. Kham bun ki kham jied beit ïa ka ktien phareng wat haba ki ïakren ïa khana para Ri.
Uwei na ki riew rangbah ha ka thaiñ Nongstoiñ bah H.Wanniang u la ong, “Kane ka ka jinglah jong ki bar jylla, ka lah ban long kum ka dak jong ka jingkyrsiew thiah ym tang ïa ki khun Khasi, hynrei ïa ki katto katne ki kmie ki kpa kiba ju khyllew da kaba kam bad ïathuh ha ki briew da kaba ki ju ong “ki khun jong nga te kim nang Khasi te ! ki tlod bha ha ka sobjek Khasi !, bad kim ju pass bha ïa ka sobjek Khasi”.
U la ong ruh, “Ki briew ïa kaei kaba ki ieid ki ju mlien ruh ban tih jylliew, ban wad bniah, ban tip khambha hato ka long kumno, kum kiba ieid ïa ka put ka tem, ieid ïa ki mrad ki mreng, ieit ïa ka mei mariang, ieit ïa ka kolshor lajong, ieit ïa la ka jaidbynriew, ieit ïa u Blei bad kiwei kiwei, bad ka ktien hi ka long kaba kongsan namar ka pynithuh ïa ka Jaidbynriew, ngi dei ban ieit naduh ïa la ki ktien shnong ter ter”.
U la ong, “To ngin buh jingkylli halade ba kumno ki nongwei ki kylla ieit ïa ka ktien jong ngi haba wat ki trai muluk kim shimkhia ïa ka?. Kumno ruh ngin lah ban pynrung ïa ka Ktien Khasi ha ka khyrnit kaba 8 lada ym don ba pyndonkam ïa ka?. Namar lada ka ktien kam pat rung ha ka dohnud, kam don jingmut ban dawa pynrung ha ki kot. Kane ka jia long namar ba ngim ieit ïa la ka tynrai bad ngim sngewthuh ïa la ka thymmei, hynrei ka jingshisha ka long lada kiwei ki lah balei ngi pat ngim lah?”.