Kham paw ka kyrteng u MDC Tura ban ïakhun ïa ka elekshon shiteng samoi, ong u Bah Hek

Shillong, Naitung 01: Ka Bharatiya Janata Party (BJP) ka la rai ban pynïeng kyrtong ha kane ka elekshon shiteng samoi Gambegre Assembly seat.
Haba ïathuh ïa kane ha ka sngi Nyngkong, u nongïalam ka BJP bad u Myntri ka sorkar jylla u Bah AL Hek u la ong, “Nga la ïasyllok ïa kane bad u president bad national vice president bad ba khmih ïa ka BJP Meghalaya. Ka party ka kwah beit ban pynïeng kyrtong ha kane ka elekshon shiteng samoi.”
U la ong pat ba ka party ka dang ap ban ïoh ïa ki kyrteng naba ki don bun kiba pan tiket.
“Kumta ki kyrteng kidei ban mih khnang ban ïoh ïasyllok,” ong u Bah Hek.
Haba kylli utei u nongïalam ka BJP u la ong ba ka kyrteng jong u MDC ka Tura u Bernard N Marak ka la kham paw bha hynrei ka shong pat ha ka party ïano yn ai ïa ka ticket.
Na ka liang u Bah Hek u la kyntait ba ka don kano kano jingpyrshah ïa u state president Rikman G Momin.
“Ngi khlem pat ïohpdiang ïa kano kano ka jingpyrshah ïa u Rikman. Ki jingkren ki lah beit ban don hynrei ngi ngeit beit ha ki jingïakren,” u la ong. Katkum ka jingïathuh jong u ki jingeh kin don beit ha manla ki political party hynrei kum kine ki dei beit ki kam ïing kam sem hapoh ka party.
Ha kaba ïadei pat ka jingkylli u Bah Hek u la ong um shym ïohi ba ka Congress kan jop beit bad kaba khlaiñ na ka Garo Hills naba ka MP election ka ïapher bad ka MLA bad MDC election.
U la ïai ong ba ka BJP kadei ka national party bad ka long barabor kaba la khreh ban ïakhun ïa ki election ha ki artylli ki autonomous district councils (ADCs).
“Lada ngi ïakhun ïa ka MP bad MLA, balei ym ïakhun ïa ka MDC elekshon kumjuh,” u la ong.