Kham noh ka UDP sha u Bah Suiñ ban ai tiket ïakhun na Mawsynram

Shillong, Jylliew 30 : Ka United Democratic Party (UDP) kawei na ki party heh ba donlang ha ka sorkar Meghalaya Democratic Alliance ba ïalam da ka NPP, ka dang bishar bniah bad peit sani bha mynta ha shwa ba kan rai ïano yn ai tiket na ka bynta ka elekshon MLA na Mawsynram Constituency.
Ki tyllong khubor ba ïohlum ki ïathuh ba tad haduh mynta hi, ki nongïalam ka UDP ki kham noh ka tarajur sha u nongïalam ka party na katei ka thaiñ hi, u Bah Oland Suin uba bat ruh kum u President ka UDP Mawsynram bad ruh kum u Vice President ka UDP East Khasi Hills.
Haba pyrshang ban pyntikna la kadei neem ba u MLA na katei ka thaiñ, Bah HM Shangpliang u pan ïa ka tiket na ka UDP, ki nongïalam ka UDP kim shym la treh ban ong ei ei hynrei ki la pynpaw beit ba ka party hi ka dang kham noh ka mon sha u Bah Suin.
“Tangba ka rai kaba khatduh hi ka shong pat ha ka komiti kaba kyrpang kaba ïadei bad kane ka kam,” ong ki heh UDP bym kwah ban pynpaw kyrteng.
Kumban shu kdew hangne, haduh mynta hi, ki kyrtong kiba la pyntikna ban aireng ki kynthup ïa u MDC ka thaiñ Bah Alvin Sawkmie, nangta u MLA ba mynta Bah HM Shangpliang bad mynta sa u Bah Oland Suin.
SHANIAH HA U MLA: Ha kajuh ka por, ki nongïalam bad nongkyrshan jong u Bah Himalaya M Shangpliang uba dei u MLA ka Mawsynram Constituency ha ka sngi Palei ki la pynlong ka jingïalang ban ïatai ïathir ha kaba ïadei bad ka jingïaid lynti na bynta ka ilekshon MLA 2023.
Ïa ka jingïalang ba la pynlong ha Riat Mawksir, Mawsynram ki nongïalam ba hakhmat bad ki nongkyrshan jong u Bah HM Shangpliang ki la wan da kawei ka jingmut ban shim ïa ka rai na bynta ban pynkhreh ïa ka ilekshon MLA 2023.
U Bah Rudy Shangpliang uba dei uwei na ki nongïalam haba ïakren bad ki nongthoh khubor hadien ba la wai ka jingïalang u la ong ba ka jingpynlong jong ki ïa ka jingïalang ka long ban pynkhlaiñ bad ban ïaid shakhmat na bynta ban ïoh ïa ka jingjop ha u 2023 hynrei ki shanñiah tylli ha u MLA ban jied ïa ka party lane kum u kyrtong indenpendent ban ïakhun ïa ka ilekshon.
“Ka jingïalang kaba la khot da ki nongïalam jong u MLA mynta ka sngi ha Mawsynram kadei na bynta ban ïapyrkhat ban pynkhlaiñ bad ban ïaid shakhmat ha kaba ïadei bad ki kam ki jam ba ngin ïoh biang ïa ka jingjop ha u 2023”.
“Ha kane ka jingïalang ngi la ïoh shibun ki jingmut lyngba ki jingïatai ïathir lyngba ki longkpa, ki longkmie bad ki samla kiba la ai shibun ki jingmut kiba skhem da ka thong ba ngin pynjop don burom biang ïa u MLA (Bah HM Shangpliang) ha u 2023,” ong u Bah Rudy.
Ha kaba ïadei pat bad ka jingpep jong u Bah HM Shangpliang ha ki jingïalang jong ka TMC khamtam ha ka sngi Balang ha ka jingwan u National General Secretary, na ka liang u Bah Rudy u la ong ba kane kadei ka kam jong u MLA hynrei kum ki nongïalam bad nongkyrshan ki dang shkem beit ryngkat u MLA. “Ka jingpep jong u ha ki jingïalang ka TMC kadei ka kam jong u shimet hynrei ngi baroh ki nongkyrshan ngi dang skhem beit bad u MLA namar ha kine ki sngi bun ba u don beit hapoh constituency namar udei u briew ba trei shitom na bynta ban peit bad khmih ïa ka khia ka shon jong ka contituency hi baroh kawei bad ruh na bynta ban pynkhreh ïalade na bynta ka ilekshon MLA 2023,” la ong u Bah Rudy.
Haba jubab shuh shuh ïa ki jingkylli u Bah Rudy u la pynshai ba ka jingleh kiar jong u Bah HM Shangpliang ïa ka TMC kam dei namar ba ka UDP ka khot ban ai ticket hynrei kum ki nongïalam ba hakhmat kim don jingtip eie namar kadei ka kam jong u MLA shimet.
“Ngi ki nongïalam ba hakhmat ngim don jingtip eie halor kane kadei ka kam jong u shimet namar ïa kano kano ka kam bad kano kano ka rai ngi ki nongkyrshan ngi shanñiah beit ha u MLA kata kadei ka jingskhem jong ngi kum ki nongkitkam.”
“Ka por ka dang don bad ka plolitk hi ka ju kylla naduh ki jingïamih ki jingïarung bad ïa kane ngim lah ban ong eiei namar ka jingpynkhreh ïa ka ilekshon ka dang don mynta sa hynñiew bnai eiei,” ong u Bah Rudy halor ki khubor ban mih noh u MLA na ka TMC.
Na ka liang ki nonïalam ki la kyntait ruh halor ka jingknieh ticket UDP u Bah HM Shangpliang da kaba ong ba kumno u Bah HM Shangpliang un ïaknieh namar ïalade u dang don bad ka TMC. “Kumno u MLA jong ngi uba dang don bad ka TMC un ïaknieh ïa ka ticket UDP bad kum ki nongïalam ngim pdiang ïa kata bad ka lynti ruh kam shah. U Bah Suiñ u la dei lypa u nongtrei jong ka party UDP uba la don la ki Unit ki Circle ngi lei ngim don hi ruh ha ka UDP te kumno un shu leit knieh bad u briew uba la trei na bynta ka party.”
U la ïathuh ruh ba mynta ki dang ailad bad shanñiah ha u MLA ban jied la un ïakhun na kano ka party ne kum u kyrtong shimet (Independent) bad shen un sa pyntip ha ki nongïalam bad pynbna paidbah ruh, hynrei u la ong ba kum ki nongkitkam kin ym peit party hynrei kin skhem beit bad u MLA namar udei u briew uba trei shitom na bynta ka Constituency hi baroh kawei.