Kham niar ban shah jied na Northeast kum ki Match Observer ka BCCI, leh burom ka SRS Ri Bhoi ïa u Bah R Kharkamni

Nongpoh, Risaw 25: Ka synjuk ki Rangbah Shnong Ri Bhoi District mynta ka sngi da ka jingangew sarong kala leh burom ïa u Bah Rayonald Kharkamni u ba dei ruh u Vice President ka Meghalaya Cricket Association bad President ka Ri Bhoi District Cricket Association u ba la shah jied kum u Match Observer ka BCCI haka jinglehkai test kriket kaba lai hapdeng ka India pyrshah ïaka New Zealand ka ban long haka 1 tarik Naiwieng ha Mumbai.
Ha katei ka jingleh burom la donlang naduh u Bah BB Makdoh Chairman ka Synjuk ki Rangbah Shnong Ri Bhoi District haka jingdonlang u Bah Rayonald Kharkamni lem bad ki Rangbah Shnong bad kum ka synjuk kala pynkupburom ruh da ka jaiñ ryndia ryngkat ka song pisa kum ka jingkitbok shuwa ba un mih naka jylla haka 30 tarik mynta u bnai.
Haba kren ha katei ka sngi naka liang u Bah BB Makdoh kum u nongïalam ka Synjuk u la pynpaw ka jingsngewkmen ba u wei naki dkhot jong ka Synjuk u la shah jied kum u match Observer ka jinglehkai test kriket ka India pyrshah ïaka New Zealand ha nongbah Mumbai bad kane ka long ka jingsarong kaba khraw ïaka dong Ri-Bhoi bad ka jylla baroh kawei.
U Bah Rayonald Kharkamni u la ai ka jingkhublei ba kyrpang ïaka Synjuk ki Rangbah Shnong kaba la shim ïaka sienjam ban kynmaw ban lehburom ïa u ha shuwa ba un leit ban shim bynta kum u Match oberserver ka BCCI bad u la ong ba kham ñiar ba ka BCCI kan jied ïaki briew naka thaiñ Shatei Lam mihngi kum ki Match Observer bad kane ka dei ka jingsarong kaba khraw ïaka jylla ha kaba un mih naka jylla naduh ka 30 tarik mynta u bnai.