Kham lah ki Seng Riewlum ban ïakhun ha u 2023 : Bah Mitchel
Resaiñ kyndit u MDC ka Laban na ka NPP
Shillong, Ïaiong 18 : Ha ka por ba NPP ka thnem bha da ka jingwan ïasoh ki MDC bad ki nongïalam na kiwei pat ki party, pynban ha kane ka sngi Nyngkong, uwei na ki MDC jong ka, na Laban – Mawprem, Bah Mitchel Wankhar u la resaiñ kyndit kyndit noh na katei ka party.
“Mynta ka sngi nga la dep ban ai ïa ka shithi resaiñ jongnga na ka party ha u President bad Secretary jong ka National People’s Party (NPP) bad kumta naduh mynta ka sngi nga la iehnoh ïa ka party,” u la ong haba kren bad ki lad pathai khubor hadien ba u la dep ban aiti ïa katei ka shithi resaiñ na ka party.
Utei u MDC uba la jop na ka tiket NPP ha ka elekshon MDC ha u 2019 u la ïathuh ba ka daw kaba pynlong ïa u ban resaiñ noh na ka party kadei namar u kham sngewjan bad kham noh ka mon ban don bad ki party riewlum ban pynkhreh na bynta ka elekshon MLA kaban long ha u 2023.
Da kaba pynbna artad ba un ïakhun na Mylliem constituency ha kane ka elekshon ban wan, u Bah Mitchel haba jubab halor ka jingkylli u ong ba katei ka rai ba u shim kam dei satia ba u don ka jingpyrshah ïa ka party NPP hynrei kadei beit tang namar u kwah ban don noh bad ki party riewlum.
“Mynta ngan ïa syllok shwa bad u paidbah bad kaei kaba u paidbah u kwah nangne shakhmat te ngin sa leh ïa kaba donkam,” u la bynrap biang.
Watla na ka liang jong u Bah Mitchel u kyntait ban ïathuh ïa ka kyrteng jong ka party ba u kwah ban leit ïasoh hynrei ki khubor ba tikna ki ïathuh ba shen un sa leit ban pynïasoh pura noh bad ka United Democratic Party (UDP), kawei na ki party ba ïalam ïa ka sorkar synrop ryngkat bad ka NPP ha ka jylla.
“Ngi la ïaid mynta 50 tylli ki snem kumta nga sngew ba la donkamban pynkhlaiñ noh ïa ki party riewlum lajong. Bad haba nga syllok bad ki paralok kiba donlang ha ka Executive Committee kiba dei na kiwei pat ki party riewlum nga ïohi ba ka long kaba sngewtynnad bad dei na kata ka daw nga sngew ba ka por ka la ih ba ngin ïaid noh shakhmat ryngkat bad ki,” u bynrap biang u Bah Mitchel.
Kumba long haduh mynta hi, ki kyrtong kiba la tikna ban aireng ha kane ka elekshon ban wan na Mylliem constituency ki kynthup ïa u MLA ba mynta Bah Hamlet Dohling, MDC ka Mylliem Bah RV Lyngdoh bad u Bah Mitchel Wankhar ba dei ruh u MDC ka Laban – Mawprem.