Mairang, Jylliew 21: San ngut ki briew na kajuh ka longing kiba kynthup ïa lai ngut ki khun, ka kmie bad u kpa ki la kem pang bad poi sha Hospital tang namarba ki la kum bam ïa u tit buid uba kim ithuh.
Kane ka la jia ha ka sngi Balang ha ka shnong Wahliewlong, Mawthad-raishan Constituency.
Katkum ka jingïathuh jong u Admitstar Marweiñ u kpa jong ki lai ngut ki khun uba la kem pang na ka jingbam tit u la ong ba ka kurim jong u ka Kong Delphina Pariong ka la leit kheit ïa u tit ha ka 20 tarik mynta u bnai bad ka la shet pat hynin mynstep.
U la ïathuh hadien ba ki ladep bam ïa une u tit ba la shetlang bad u phan ki la sdang ban suh kpoh, prie bad kieng ka khlieh. Markumta la pynkit noh ïa ki baroh san ngut sha Pariong PHC ban ïoh ïa ka jingsumar hynrei kham hadien la pynkynriah noh sha Tirot Sing Memorial Civil Hospital, Mairang ban ïoh ïa ka jingsumar kaba kham paka.
U Bah Marwein u la ïathuh ruh kaba la pynlong ïa ka kurim jong u ban shet ïa u tit bym ithuh ka dei hadien ba ka ladep ban bam im shwa ïa u bad namarba um don jingktah eiei ka la shet jyntah hynrei khlem poi pyrkhat pat ba kin ïohpang.
