Shillong, Nailar 12: Katkum ka jingtip kaba thikna, ki pulit ki la ïoh ban bat noh ïa 2 ngut ki briew kiba kyrteng Tecksin D Sangma ba la 29 snem ka rta bad u Cherang D Sangma ba la 23 snem ka rta katba ki dang pyrshang ban phet da ka thuk thuk kaba don u nombar AS-16A-3296 ha ka thaiñ Nokchi (WGH) bad na ki, ki pulit ki la lap ba ki pynïaid ïa ki pisa thok India kiba shongdor T. 15,500/- bad ïa kine ki pisa la lap na u Cherang D Sangma.
Shuh shuh ha kaba ïadei bad kane ka jingjia, da ka jingïalam kitei ki briew, na ka liang ki pulit ki la ïoh kem pat sa ïa 2 ngut kiwei pat ki briew kiba kyrteng Mikrang D Sangma bad Sengtin R Marak na ka jaka sah jong ki kaba ha Dobokgre (WGH) bad na ki ruh ki la ïoh ban kurup pisa thok ba shongdor T. 29,500/- na ki. Halor kane ka jingjia u Walton D Sangma ba la 27 snem ka rta u la aiti hi noh ïalade ha Purakhasia OP (WGH).
Katkum ka jingtohkit la lap ba uwei u briew bym lah ban ithuh u la aiti ïa kane ka pisa thok kaba long T. 95,000/- sha u Walton D Sangma ha ka thaiñ Chapati na ka bynta ban kylliang pat bad ka pisa kba shongdor T. 50,000/-. Na ka liang ki pulit ki la ïathuh ba ki la kem noh ïa kitei ki briew kiba la shah kynnoh halor kane ka kam.
