Khliehriat Rymphang 27: Kum ka jingïakhun ban tehlakam ïa ka jingtih dewïong beaiñ hapoh ka district, ki pulit jong ka East Jaiñtia Hills District hynnin ka sngi ka 26 tarik u Rymphang 2026 ki la kem noh haduh khyndai ngut ki briew kiba donkti ha kaba tih dewïong beaiñ ha ka par dewïong ha Umthe, East Jaiñtia Hills District.
Ki bor pulit ki la lap ïa ka jingtih dewïong beaiñ dei lyngba ka jingïoh jingtip kaba lyngba ki kor ring dur ne ki drone kiba jurip ïa ki jaka ba don dewïong, kumta mar mar hynnin ka sngi ki pulit ki la pynlong ïa ka jingleit khynra ha par dewïong ha Umthe kaba hap hapoh Umpleng Police Outpost bad ha ka jingkhynra ki pulit ki la lap ïa ki briew kiba dang tih dewïong kiba pynkheiñ ïa ki aiñ ïada mariang.
Ki briew kiba la kem bad pynngat hapoh ki kyndon aiñ ki dei kiba la tip kyrteng kum u Nilu Thapa, 45 snem kyrta, uba na ka shnong Manja ba hap hapoh ka PS Diphu, Karbi Anglong, Assam, u Dipak Thapa, 40 snem kyrta, uba na ka shnong Diphu, Karbi Anglong, Assam, u Vishal Rai, 26 snem kyrta uba na ka shnong Bojpur District Nepal, u Pula Rai, 58 snem kyrta uba na Sherpator Rai gaon, Kalimpong District West Bengal, u Babu Giri, 40 snem kyrta uba na ka shnong Dimapur Nagaland, u Bet Kumar Liwang, 38 snem kyrta uba na Sita Chowk Jhapa District Nepal, u Singh Ingti, 30 snem kyrta uba na ka shnong Timunga District Karbi Anglong, Assam, u Prakash Chettri, 32 snem kyrta, uba na ka shnong Terathum District Nepal bad u Gopal Magar,uba na ka shnong Kohara, District Jhapa.
Katkum u kyrwoh khubor ba la phah da u Superintendent of Police East Jaiñtia Hills District, u Pankaj Rasgania, IPS, la ong ba ka jingdon u dewïong uba la dep tih beaiñ ba la kurup noh da ki pulit ka long haduh kumba 55 Matrik Ton, ki bor pulit ki la kurup noh ïa utei u dewïong beaiñ na ka jaka ba tih dewïong ha ka jingdon lang bad jingsakhi lang u Executive Magistrate.
Ha kaba ïadei bad kane ka jingtih dewïong beaiñ bad ka jingkem ïa kiba donkti ki bor pulit ki la buh ne ujor da ka ejahar bad ka jingtohkit ka dang ïaid shakhmat ban lap shuh shuh sa kiwei kiba don kti ha kane ka jingtih dewïong beaiñ, la ong ruh ba ki bor pulit jong ka East Jaiñtia Hills District ki shimkhia bha ban pynlong ïa ka district kaba lait na ka jingtih dewïong beaiñ.
