Kem noh ki pulit ANTF East Jaiñtia Hills ïa ki ar ngut ki kynthei kiba don kti ha ka kam khaïi drok

Khliehriat Risaw 27: Ka kynhun jong ki pulit ANTF East Jaiñtia Hills District bad ANTF East Khasi Hills mynta ka sngi ki la kem noh ar ngut ki kynthei kiba don kti ha ka kam khaïi drok bad ki la ïoh ruh ban kurup 29.5 gram u drok herion.
Katkum ka jingpyllait khubor u Superintendent of Police East Jaiñtia Hills District, u Jagpal Singh Dhanoa, IPS, la ong ba hynnin ka sngi ki pulit ki la ïoh jingtip ba kawei na ki nong khaïi drok kaba la tip kyrteng kum ka Kim Khongsai ka don jingthmu ban leit na shnong Jeribam sha nongbah Shillong, kumta hi mar mar ki pulit ANTF lem bad ki pulit jong ka Khliehriat Police Station ki la pynlong ïa ka bud dien bad khang kdong kumta mynta ka sngi ha ka por 1 baje myn sngi ki la ïoh bat ïa katei ka kynthei.
Ha ka jingtohkit ki pulit, ka Kim Khongsai ka la phla ïa ki kam jong kawei pat ka nongkhaiï drok ba la tip kyrteng da ka Rihun Dkhar kaba sah ha Shillong, kumta ka kynhun pulit na East Jaiñtia Hills District ha ryngkat ka jingïatreilang bad ki pulit jong ka East Khasi Hills District ki la leit khynra ha ka jaka sah kaba ha Shillong ha kaba ki la ïoh ban kurup 29.5 gram u drok herion, ha kaba ïadei bad kane ïa ka ejehar la register ha Laitumkhrah Police Station.