Shillong, K’Lyngkot 17: Ki Pulit ka Rajabala ki la ïathuh ba ki la ïoh ban kem sa arngut ki briew kiba suba donkti ha ka jingpynïap ïa u dkhot ka ACHIK Dilseng M Sangma, kaba la kynjoh sha ka 8 ngut baroh lang kiba la shah kem. Ki arngut kiba dang shu shah kem ki dei u Mozahidur Momin ba 22 snem bad u Mofidur Hussain ba 22 snem. Ïa kine ki arngut la kem ha ka miet sngi Palei na Diara South Salmara ha Assam.
Ïa kane ka jingkem la pynthikna ruh da u Superintendent of Police ka West Garo Hills.
Ki hynriew ngut kiwei pat kiba la kem ha shuwa ki kyrteng u Rafiqul Islam (47), Anarul Islam (30), Atowar Islam (40), Ariful Islam (30), Bahadur Shiekh (21) bad u Mozidur Hussain (22).
Lah ban pynkynmaw ba u Dilseng Sangma, u dkhot ka ACHIK, ula shah pynïap ha ka 9 tarik Kyllalyngkot ha ka por 2 baje eiei katba u dang ïahiar leit jurip ïa ka par tih maw ba beaiñ kaba don ha ka thaiñ Rajabala, West Garo Hills. Kane ka jingjia kala jia ha Goalgoan.
U trai jong kane ka par haduh mynta u dang phet rieh bad ka jingthwet ïa une u briew ka la ïaid shakhmat.
