Nongpoh, Jymmang 06: Da jingshim khia ki Pulit ka Ri Bhoi haduh 6 ngut ki briew kiba dei na Nigeria ki la shah kem noh ha aki Pulit ka Ri Bhoi, kaba dei hadien ba la suba ba ki don kti ha ka kam pynïap briew ha Nongbah Mumbai.
Kumba la ioh lum jingtip, la ong ba ki Pulit ka Ri Bhoi ki la pynap shrip ïa kitei ki Briew na Negeria ha Lad Umsaw bad hadien ba ki la poi ha katei ka jaka la ioh ban kem ïa ki, kaba dei hadien ba la ioh jingitp bad ba la suba ba ki don kti ha ka kam pynïap briew ha Mumbai.
Kitei ki 6 ngut ki briew na Nigeria kiba la shah kem ha ki Pulit ka Ri Bhoi la ithuh kum u kynthup ïa u Eze Christopher Obasi (43), u Ahukanna Chinonso – 46, u Obi Francis Osita – 36, u Okoro Kelvin Chidozie – 29, u Emmanuel Agbeyi – 37 bad u Osagiede Godstime – 38.
Ka tyllong khubor na ki Pulit ka Ri Bhoi, la ong ba kitei ki 6 ngut kiba la suba ba ki don kti ha ka kam pynïap briew ha Mumbai ki dei kiba la pyrshang ban phet rieh na Mumbai bad ki thmu ban leit sha ka Ri Bangladesh, hynrei mynta ka sngi da ka jingbuddien ki Pulit ka Ri Bhoi ki la shah kem noh ha Lad Umsaw ha Ri Bhoi District.
La ong ruh ba kitei ki 6 ngut ki briew na Nigeria ki dei kiba wan kawei ka Sumo kaba don ïa u number ML 10 B 9779 bad hadien ba ki la shah kem ki la shah pynngat ha Waliv Police Station CR Case Number 481/2022 under sections 302/364/201/323/143/147/149 IPC kiba dei ki case halor ki kam pynïap briew.
Na ka liang ki Pulit ka Ri Bhoi ruh hadien ba la shah kem kitei ki 6 ngut ki briew na Nigeria ki la dang pynlong ïa ka jingtohkit kaba jur bad kumjuh ruh ban leht katkum ki kyndon jong ka aiñ.
