Shillong, Naitung, 05:Ki Pulit jong ka Lumdiengjri Police Station ha ka sngi Baar ka 5 tarik, Naitung, 2022 ki la kem noh ïa uwei u briew uba la tip kyrteng kum u Banpyrkhat Lyngdoh Nonglait,uba la 32 snem ka rta halor ka jingdonkti ban shoh ïa uwei u rangbah ha Jaïaw Langsning ïa uba la tip kyrteng kum u Bah Leo Dangdonborlang Sun.
Katkum u kyrwoh ba la phah da u Superintendent of Police ka East Khasi Hills District u Bah Sylvester Nongtnger la ïathuh ba ki Pulit kiba la buddien ïa ka video ba la saphriang ha WhatsApp halor kane ka jingjia kaba la jia ha ka 3 tarik, Naitung, 2022 ha lad Jaïaw Langsning mar pyrshah bad ka Workshop jong ka Rani Motors ki la pynlong ïa ka jingtohkit kaba bniah lyngba ka CCTV ba la pyndait surok.
U SP la ïathuh ba u Bah Leo Dangdonborlang Sun uba la ïohi ïa u Bah Banpyrkhat Lyngdoh Nonglait uba la prong shapoh ka phyllaw jong ka Nahnah da ka jingthmu kaba sniew u la hylla bad beh ïa u kat haduh ba ka la poi haduh u pud ba kin da ïakynrup para ma ki.
Ha ka jingïashoh hapdeng kine ki arngut u Bah Leo Dangdonborlang Sunn u la mynsaw jur. Hadien kane ka jingjia u Bah Leo Dangdonborlang Sunn lem bad ka hymmen jong u ki la leit mudui da ka ejahar sha ki pulit jong ka Lumdingjri Police Station ha ka 4 tarik, Naitung, 2022. Ha kaba ïadei bad kane ki Pulit ki la register case halor kane ka jingjia hapoh ka kyndon 506/325 jong ka Indian Penal Code.
Ha ka jingthwet kaba jur, ki Pulit ki la ïohkem ïa u Bah Banpyrkhat Lyngdoh Nonglait na Iewduh ha ka por kumba 12 shiteng bad ïa une uba donkti ban shoh pynmynsaw bad prong ha phyllaw iing ki briew da ka jingthmu kaba sniew ki Pulit ki la rah ban tian bishar ha Kashari.
