Kem ki Pulit ka Ribhoi ïa u Pulit Assam uba thmu ban leh be-ijot ïa ka heprit

Shillong, Nailar, 30: Ki Pulit ka Ribhoi District ha ka sngi Saitjaiñ ki la hiar sha ka shnong Lumding, Assam ban kem ïa uwei u Pulit ka Jylla Assam uba la tip kyrteng kum u Projen Langthasa jong ka 18th Assam Police Battalion, Lumding uba pyrshang ban leh be-ijot ïa kawei ka heprit kynthei na kawei ka shnong hapoh ka thaiñ Block-II kaba hap hapoh u pud u sam jong ka Mawlasnai Out Post.
Ha u kyrwoh ba la phah da u Senior Superintendent of Police ka Ribhoi District u V.S Rathore u la pyntip ba ha ka 27 tarik, Nailar, 2025 la mudui ejahar ba uwei u Pulit Assam u la thmu ban leh beijot ïa kawei ka heprit kynthei bad shah kem ruh ha ki paidbah bad ha ka jingïakhun u lait phet da ka said.
U SP u la ïathuh ba ïa ka case la register ha Nongpoh Women Police Station hapoh ka Section 3(a)/4/5(a)(iv)(m)/6/18 jong ka POCSO Act bad ka jingtohkit ka la ïaid shakhmat.
Ka kynhun Pulit na Ribhoi ka la hiar sha Lumding, Assam ban kem ïa u Projen Langthasa mynta ka Sngi Saitjaiñ ha ka por shiteng sngi bad ïa une u Pulit la wanrah sha Nongpoh ha ka por janmiet.
Shuh shuh u SP u la ïathuh ba ka jingtohkit ka la ïaid shakmat bad shen yn sa aiti sha ka Kashari ïa ka jingpynngat kyndon ne ka Chargesheet pyrshah ïa u Projen Langthasa.
U SP u la kular ba ka tnat Pulit jong ka Ribhoi District kan sa leh ïa kaba donkam bad ban pynstet noh mardor ïa ka jingtohkit bad ka jingpynngat kyndon khnang ban pynïoh ïa ka hok jong ka lanot bad ba ka Sorkar kan ïoh siew kham kloi ïa ka bailutksan sha ka lanot.