Nongpoh, Nailar 01: Ki pulit jong ka Jorabat Police Oupost mynta ka sngi kila ioh ban kem 2 ngut ki briew kiba dei ki Khasi ryngkat bad 40 kilo u Ganja bala suba ruh ba kidei kiba la donkti ban shalan ïa u Ganja haka jingtalasi ïaki kali ha Jorabat.
Katkum ka jingtip ba la iohlum, la ong, ba ki bor pulit ka Jorabat Police Outpost, hadien ka jingioh jingtip ba thikna halor ka jingthmu ïaid lynti jong ki briew kiba thmu ban shalan ïa u jingdih buaid ganja ki la pynlong ïa ka jingtalasi bad dei ha ka por 10 baje eiei mynstep ki la ioh ban bat ïa kawei ka kali Zen kaba don ïa u number ML 10 C 9707 bad haka jingtalasi jong ki pulit la ioh ban kurup 40 kilo u kynja bad ioh ruh ban kem 2 ngut ki briew kiba shong ha katei ka kali.
Kitei ki 2 ngut kiba la shah kem bad donkti ha katei ka kam kidei kiba la tip kyrteng kum u Kitboklang Marwein (30) ba shong basah ha Mawiong, East Khasi Hills District bad u wei pat la tip kyrteng kum u Vian Nongrum (23) ba shong basah ha ki thaiñ Nongpoh Ri-Bhoi District. Haka jingtohkit jong ki pulit kitei ki 2 ngut kila phla ruh ba ïa u tei u kynja la thmu ban leit pynpoi sha kawei ka longkmie ha ka thaiñ Kha-napara kaba la tip kyrteng kum ka Pari Dawri bad naka liang ki pulit kila leit ruh ban kem ïa katei ka longkmie bad ka jingtohkit naka liang ki pulit ka dang ïaid shakhmat ban lap dien shuh shuh ïa kiba donkti ha katei ka kam.
